Astanadaǵy sot Erbolat Janábilovtiń jubaiy – Elmira Tólegenovany tergedi. Alaida sýdia qoiǵan keibir suraqtarǵa ol tolyqqandy jaýap bere almady, dep habarlaidy Dalanews.kz.
Sýdia Aqerke Bekturǵanova utys oiyndarynyń ótkizilý tártibi men Tólegenovanyń róline qatysty surady. Ol ózin JShS atynan ókil retinde kórsetip, kýrstardyń ótýin jariialaǵanyn, sol kýrstardy satyp alǵan qatysýshylarǵa bonýs berilgenin aitty. Alaida utys sharttarynyń naqty qaida reglamenttelgenin naqtylai almai, bul suraqty tehnikalyq mamanǵa qoiý kerek dep jaýap berdi.
Tólegenova utys oiyndaryn uiymdastyrýǵa qatysty basqa da jaittardy túsindirip bere almady. Ol sotta tehnikalyq bólimdi jaqsy bilmeitinin moiyndap, sondyqtan qatysýshylar men jeńimpazdardyń naqty sanyn atai almaitynyn jetkizdi.
«Tehnikalyq jaǵynan myqty emespin. Esepti maman júrgizedi. Maǵan belgilisi – eki avtokólik, iPhone, aqshalai syilyqtar oinatyldy jáne shamamen júz adam marapattaldy», – dedi ol.
Sondai-aq sot nege utystardy ótkizý úshin korporativtik akkaýnt emes, Tólegenovanyń jeke Instagram paraqshasy paidalanylǵanyn surady.
«Men atalǵan JShS-niń direktory bolǵandyqtan, meniń paraqsham qoldanyldy. Stories-ke kýrstar jaily aqparatty saldym, al tómenge kompaniia saityna siltemeni qostym», – dep túsindirdi bloger.
Sotta syilyqtardyń qalai tabystalǵanyna qatysty da suraqtar qoiyldy. Tólegenova aqshalai júldelerdi óziniń jeke shotynan aýdarǵanyn, al avtokólikter men tehnikanyń «buiryq pen mór arqyly qaita rásimdelgenin» aitty. Onyń sózinshe, syilyqtardy qarjylandyrý olardyń «Zhana Business» JShS qarajatynan júrgizilgen.
