Qyrkúiektiń 13-14 -i kúnderi Astana qalasynda Qyzylorda oblysy taýaróndirýshileriniń qatysýymen aýyl sharýashylyǵy ónimderiniń jármeńkesi uiymdastyryldy,- dep habarlaidy Dalanews.kz
Jármeńkege 50 júk kóligine tielgen 60-qa jýyq taýaróndirýshiniń quny 200 mln. teńge bolatyn 500 tonnaǵa jýyq ónimi aparylǵan.
Atap aitqanda, 200 tonnadan astam kúrish, 10 tonna et, 20 tonnadai balyq, 160 tonna baqsha ónimderi, 80 tonnadan astam kókónis pen jemis-jidek, 15 tonnaǵa jýyq sút jáne konditer ónimderi, 5 tonna as tuzy jetkizildi.
Sondai-aq, jármeńke aiasynda Syr eliniń ónerpazdary qatysqan mádeni-tanymdyq kontserttik baǵdarlama elordalyqtarǵa erekshe kóńil-kúi syilady.
Memlekettik qoldaýdyń arqasynda aimaqtyń aýyl sharýashylyǵy salasy qarqyndy damyp keledi. Básekege qabiletti ónim óndirý arqyly azyq-túlik qaýipsizdigin qamtamasyz etý jolǵa qoiylǵan.
Osy jyldyń 7 aiynda aýyl sharýashylyǵynda 46,5 mlrd. teńgeniń ónimi óndirilip, ósim kórsetkishi 2,6%-ǵa artty.
Oblys boiynsha 189,6 myń gektarǵa aýyl sharýashylyǵy daqyldary egildi, atap aitsaq, dándi daqyldar 92,9 myń gektar, maily daqyldar 5,7 myń gektar, mal azyqtyq daqyldar 73,3 myń gektar, kartop, kókónis, baqsha 17,4 myń gektar. Úkimet bekitken Jol kartasyna sáikes 80,9 myń gektar jerge kúrish sebildi.
Sharýashylyqtar egin jinaýǵa qajetti aýyl sharýashylyǵy tehnikalarymen, janar-jaǵarmaimen, mineraldy tyńaitqyshtarmen tolyq qamtamasyz etilgen.
Búginde egin jinaý naýqany qarqyndy júrýde. Erte egilgen dándi daqyldar tolyq jinalyp bitti. Qazirgi tańda mal azyqtyq, maily daqyldarmen qatar kókónis, baqsha jáne kúrish jinalýda.
Aimaqta mal sharýashylyǵyn damytýǵa jasalǵan qoldaýdyń nátijesinde tórt túlik mal basy ósip, ónim óndirý ulǵaidy.
Oblys boiynsha 2025 jyldyń 1 tamyzyna 425,4 myń bas iri qara, 830,3 myń bas qoi men eshki, 270,7 myń bas jylqy, 66,0 myń bas túie jáne 126,8 myń bas qus tirkelgen. Ótken jyldyń sáikes kezeńimen salystyrǵanda iri qara 0,5%-ǵa, jylqy 9,7%-ǵa, túie 1,2%-ǵa, qus 1,2%-ǵa artty.
Óńirde aýyl sharýashylyǵy ónimderiniń eksporty qarqyndy damyp keledi. Biyl oblystan quny 18,8 mln. dollardy quraityn 37,7 myń tonna ónim álemniń 19 memleketine eksporttaldy.
Barlyq eksporttalǵan ónimniń 89,4 paiyzyn quraityn kúrish ónimi Resei, Belarýs, Qyrǵyzstan, Tájikstan, Ýkraina, Ázerbaijan, Ózbekstan, Grýziia, Mońǵoliia jáne Irak memleketterine jiberildi.
Azyq-túlik qaýipsizdigin qamtamasyz etý maqsatynda aimaqta investjobalardyń jol kartasy ázirlenip, jalpy quny 57,1 mlrd teńgeni quraityn 30 jobany iske asyrý josparlanýda. Bul jobalar óńir ekonomikasyn odan ári órkendetýge baǵyttalǵan.
