World Boxing federatsiiasynyń uiymdastyrýymen alǵashqy álem birinshiligi ótti. Dúbirli dodaǵa 60 elden 500-den astam bylǵary qolǵap sheberi qatysyp, boksshylar 10 salmaq dárejesinde medaldardy sarapqa saldy.
Qazaqstan kil myqtylardy jinap, tolyq quramda óner kórsetti. Ulttyq qurama buǵan deiin Almaty oblysynda oqý-jattyǵý jiynyn ótkizip, keiin Sheffildke baryp daiyndyq jumystaryn jalǵastyrǵan bolatyn. Jalpy jerlesterimizdiń saqadai sai ekeni baiqaldy.
Bul álem chempionatynyń basty jańalyqtarynyń biri kýbalyq Hýlio Sezar La Krýstyń 90 keliden joǵary salmaqqa aýysýy boldy. Buǵan deiin jartylai aýyr salmaqta baq synaǵan ol biyl asa aýyr salmaqtaǵy alpaýyttarmen kúsh synasty. Osy salmaqta Qazaqstan quramasynyń kapitany Aibek Oralbai da óner kórsetti. Sondai-aq ázerbaijandyq Mýhammad Abdýllaev ta qarsylas atandy. Sońǵy ret Aibek pen Mýhammad Astanada ótken Álem kýbogy kezeńinde judyryqtasyp, ol kezde Aibek esh qiyndyqsyz jeńiske jetip, altyn medal oljalaǵan edi. Bul joly da Aibektiń kýbalyq jáne ázerbaijandyq boksshylardan ailasyn asyrýy basty «intrigasy» boldy.
65 kelige deiingi salmaqta 2024 jylǵy Olimpiada chempiony kýbalyq Erislandi Alvares pen úndistandyq Abhinash Djamval judyryqtasty. Aita ketsek, Abhinash buǵan deiin Astanadaǵy Álem kýbogy kezeńinde Ertýǵan Zeinýllinovty jeńgen bolatyn.
80 kelige deiingi salmaqta básekelestik joǵary deńgeide ótti. Bul salmaqta Parij-2024 Olimpiadasynyń kúmis júldegeri Nurbek Oralbai el namysyn qorǵady. Onyń qarsylastary qatarynda Rahim Gonsales (AQSh), Vanderlei Pereira (Braziliia), Sezar Iojerlen (Frantsiia), Javohir Ýmmataliev (Ózbekstan) syndy myqtylar boldy. Degenmen Nurbektiń Olimpiadadaǵy kúmisi ony favoritterdiń qataryna qosty.
50 kelige deiingi salmaqta Sanjar Táshkenbai qarsylas shaq keltirmei óner kórsetti. Al 55 kelige deiingi salmaqta Mahmud Sabyrhannyń basty qarsylasy dominikandyq Djýnior Alkantara bolsa, ózbek Mirazizbek Mirzahalilov ta júlde úshin kúresti.
60 kelige deiingi salmaqta ózbekstandyq Abdýmalik Holokov óner kórsetip, onyń basty qarsylasy Parij-2024 Olimpiadasynyń kúmis júldegeri Mýnarbek Seitbek ýýlý boldy.
70 kelige deiingi salmaqta Qazaqstannyń jas juldyzy Tórehan Sabyrhan alǵash ret eresekter arasyndaǵy álem chempionatyna qatysyp, favoritterdiń qatarynan kórindi.
75 kelige deiingi salmaqta ámbebap boksshy Sabyrjan Aqqalyqov álem chempiony ataǵy úshin kúresti. Álem kýbogy kezeńindegi jeńisinen keiin onyń favorit atanýy zańdy boldy.
85 kelige deiingi salmaqta 2019 jylǵy álem chempiony Bekzat Nurdáýletov tájiribesin paidalanyp, qaitadan jeńis tuǵyryna kóterilýge tyrysty. Bul salmaqta ózbek Akmoljon Isroilov pen úndistandyq Djýgný da altyn úshin talasty.
90 kelige deiingi salmaqta Saǵyndyq Toǵambai baq synady. Buǵan deiin Astanada ótken Álem kýbogynda Isaias Santos Ribeirý Filo osy salmaqta chempion atanǵan edi. Sondai-aq amerikalyq Djordj Malachi de tehnikalyq sheberligimen kózge tústi.
Sarapshylar bul dodada medaldardy Qazaqstan, Ózbekstan jáne Kýba quramalary ózara bólisip alady dep boljaǵan. Óitkeni sońǵy 2023 jylǵy álem chempionatynda Ózbekstan 5 altyn, Qazaqstan 4 altyn, Kýba 1 altyn jeńip alǵan bolatyn.
Jalpy álem birinshiligi 14 qyrkúiekke deiin jalǵasty.
7 altyn
Qazaqstan quramasy dúbirli dodada on medalǵa qol jetkizdi. Onyń jeteýi altyn bolyp, jalpykomandalyq esepte birinshi orynǵa turaqtady. Qorjynymyzda jeti altyn, bir kúmis jáne eki qola júlde bar.
Ekinshi orynǵa alty altyn, eki kúmis jáne úsh qola enshilegen Ózbekstan quramasy jaiǵasty. Al úshinshi oryn Úndistanǵa buiyryp, olar eki altyn, bir kúmis pen bir qolany ielendi.
Aita keteiik, Qazaqstan álem chempionatyn jeti altyn medalmen túiindedi. Chempion atanǵandar: Alýa Balqybekova (51 kelige deiin), Sanjar Táshkenbai (50 kelige deiin), Mahmud Sabyrhan (55 kelige deiin), Aida Ábikeeva (65 kelige deiin), Natalia Bogdanova (70 kelige deiin) jáne Tórehan Sabyrhan (70 kelige deiin).
Nazym Qyzaibai (48 kelige deiin) kúmis júlde iegeri atansa, Viktoriia Grafeeva (60 kelige deiin) men Eldana Tálipova (80 keliden joǵary) qola júldemen qýantty.
Finalǵa sholý
Finalǵa deiin súrinbei jetken Aibek
Aibek Oralbai Ulybritaniiada ótken álem chempionatynda top jaryp, altyn medal ielendi. Ol 90 keliden joǵary salmaqta finalǵa deiin súrinbei jetti. Sheshýshi jekpe-jekte Aibek ózbekstandyq Jahongir Zokirovpen kezdesti. Alǵashqy eki raýndta qarsylasy basymdyq kórsetkenimen, qazaqstandyq boksshy sońǵy úshinshi kezeńde jiger tanytyp, jeńisti julyp aldy.
Nátijesinde Aibek Oralbai (90 keliden joǵary) álem chempionatynyń altyn júldegeri atandy.
Aǵaiyndylardyń jeńisi
Qazaqstandyq jas boksshy Tórehan Sabyrhan Liverpýlde (Ulybritaniia) ótken álem chempionatynda altyn medal ielendi. Ol 70 kelige deiingi salmaqta qarsylas shaq keltirmei úzdik shyqty. Finalda Tórehan japondyq Sevon Okadzavamen jolyǵyp, teń dárejede ótken jekpe-jekte sońǵy raýndta basymdyq tanytyp, jeńisti julyp áketti. Osylaisha, 19 jastaǵy Tórehan Sabyrhan eresekter arasyndaǵy alǵashqy álem chempionatynda-aq altynnan alqa taqty.
Al onyń aǵasy Mahmud Sabyrhan da el úmitin aqtap, chempion atandy. Liverpýlde ótken dúbirli dodada ol 55 kelige deiingi salmaqta finalda ispandyq Rafael Losano Serranony jeńdi. Úsh raýnd boiy aiqyn basymdyq kórsetken Mahmud Sabyrhan qarsylasyna esh múmkindik bermei, altyn medalǵa qol jetkizdi.
Sanjardyń jeńisi
Álem birinshiliginde qazaqstandyq boksshy Sanjar Táshkenbai da jeńis tuǵyryna kóterildi. 50 kelige deiingi salmaqtaǵy finalda ol mońǵoliialyq Aldarqhishig Battýlgamen kúsh synasty. Jekpe-jektiń alǵashqy raýndynan bastap tizgindi óz qolyna alǵan Sanjar úsh raýnd boiy qarsylasynan basym tústi.
Top jarǵan qyzdar
Qazaqstan áielder quramasynyń múshesi Alýa Balqybekova altyn medal ielendi. 51 kelige deiingi salmaqta óner kórsetken qazaqstandyq sportshy finalda túrkiialyq Býse Naz Chakyroglýmen kúsh synasty. Qarsylasyna múmkindik bermegen Alýa sheshýshi jekpe-jekte aiqyn basymdyq tanytyp, 5:0 esebimen jeńiske jetti. Osylaisha, ol eki dúrkin álem chempiony atandy.
Alaida tóreshi Alýa jeńiske jetkenin jariialaǵan sát túrkiialyq jattyqtyrýshyǵa unamaǵan sekildi. Nátije shyqqan kezde jattyqtyrýshy ashýlanyp, Qazaqstan tarapyna narazylyǵyn bildirip jatty. Onyń naqty ne degeni belgisiz. Alaida bul sát tikelei efirge túsip qaldy.
Álem chempionatynyń finalynda top jarǵan taǵy bir qyz – Aida Ábikeeva. 65 kelige deiingi salmaq dárejesinde óner kórsetken burymdy boksshymyz finalda ózbekstandyq Navbahor Hamidovamen judyryqtasty. Alǵashqy eki raýndta qarsylasy upai jaǵynan basymdyq tanytqanymen, sheshýshi kezeńde Aida tamasha boks úlgisin kórsetip, jaǵdaidy óz paidasyna bura aldy.
Nátijesinde ol jeńisti julyp alyp, eki dúrkin álem chempiony ataǵyna qol jetkizdi.
Al 70 kelige deiingi salmaq dárejesinde synǵa túsken qazaqstandyq Natalia Bogdanova óz qarsylastaryna esh múmkindik bergen joq.
Finalda ol aýstraliialyq Lekeisha Pergolitimen kezdesip, aiqyn basymdyq tanytty. Jekpe-jekte tolyq ústemdik qurǵan Natalia esh qiyndyqsyz jeńiske jetip, altyn medal ielendi.
Sonymen qatar, Nazym Qyzaibai (48 kelige deiin) kúmis júldeger atandy. Viktoriia Grafeeva (60 kelige deiin) men Eldana Tálipova (80 keliden joǵary) qola júldemen erekshelendi.
Belgili boks menedjeri Bolat Mankenov qazaqstandyq sportshylardy jeńisimen quttyqtady.
"Bapkerlerdi,boksshylardy,federatsiia uiymynyń qyzmetkerlerin quttyqtaimyz. Aldaǵy bolatyn Olimpiada oiyndarynda osyndai dárejede óner kórsetýge taýsylmas qýat,densaýlyq,qajymas eńbekpen sheberlik tileimiz", - deidi Mankenov.
Sonymen qatar, jattyqtyrýshy Tursynǵali Edilov boksshylardyń ónerine pikir bildirgen bolatyn.
Sýretter: Ulttyq olimpiada komitetinen
