Jumysshy mamandyqtar jyly aiasynda Senat janyndaǵy Senatorlar keńesiniń 11 múshesi Shyǵys Qazaqstan oblysyndaǵy tehnikalyq jáne kásiptik bilim berý (TjKB) uiymdaryn aralaidy, - dep habarlaidy Dalanews.kz
ShQO ákimdiginde Senatorlar keńesiniń músheleri Shyǵys Qazaqstan oblysynyń ákimi Nurymbet Saqtaǵanovpen kezdesti.
"Saparlaryńyzdyń negizgi taqyryby – óńirdiń eńbek naryǵyn bilikti kadrlarmen qamtamasyz etý. Bul – kún tártibindegi basty mindetterdiń biri. Búgingi kúni bul biz úshin jai ǵana statistika nemese jospar emes, bul – óńir damýynyń kepili.
Qazaqstan Respýblikasynyń Prezidenti Qasym-Jomart Kemeluly Toqaevtyń bastamasymen 2025 jyl – Jumysshy mamandyqtar jyly bolyp jariialandy. Bul – jai ǵana simvolikalyq qadam emes. Bul – eńbek adamyna degen institýtsionaldyq qurmettiń kórinisi. Shyǵys Qazaqstanda biz bul baǵyttaǵy jumysty naqty kórsetkishter men kásiporyndardyń qajettilikterine súiene otyryp júrgizip kelemiz.
Búginde oblys ekonomikasynyń negizin mashina jasaý, metallýrgiia, aýyl sharýashylyǵy jáne qurylys salalary quraidy. Osy salalardy kadrlarmen qamtamasyz etý – basty maqsatymyz", – dedi ShQO ákimi Nurymbet Saqtaǵanov.
Oblystyń 38 kolledjinde 20 myńnan astam stýdent 101 suranysqa ie mamandyq boiynsha bilim alýda, olardyń tórtten biri jumysshy mamandyqtary boiynsha oqidy. Kolledj stýdentteriniń 23%-y jumysshy mamandyqtaryn meńgerýde. Óńirde dýaldy oqytý júiesi júieli túrde engizilýde – 27 kolledjde jáne 448 kásiporynda 5 myń stýdent bilimin tikelei óndiriste alýda.
"Óńirdegi kadr máselesin júieli túrde sheshý úshin 2024 jyldan bastap alǵash ret «Shyǵys mamany» jeńildetilgen ipotekalyq baǵdarlamasyn iske qostyq. Baǵdarlama eń aldymen jylý energetikasy salasyndaǵy mamandarǵa arnalǵan. Bul – bir jaǵynan eńbekke yntalandyrý bolsa, ekinshi jaǵynan óńirge kadr tartýdyń tiimdi quraly. Baǵdarlamanyń nátijesi oń bolǵan jaǵdaida, ony keńeitý josparlanýda", – dedi Nurymbet Saqtaǵanov.
Baǵdarlama aiasynda Senatorlar keńesiniń músheleri oblystyń depýtattar korpýsymen kezdesip, D. Serikbaev atyndaǵy ShQTÝ-dyń Lý Ban sheberhanasynda boldy.
Qazirgi ýaqytta munda «Kólik, kólik tehnikasy jáne tehnologiialary», «Tasymaldaýdy uiymdastyrý, qozǵalys jáne kólikti paidalaný» bilim berý baǵdarlamalary boiynsha 400-ge jýyq stýdent pen magistrant bilim alýda, olardyń qatarynda sheteldik stýdentter de bar.
Ótken jyly «Kólik mashina jasaýyndaǵy smart-tehnologiialar men jasandy intellekt» atty jańa innovatsiialyq bilim berý baǵdarlamasy ashyldy.
Lý Ban sheberhanasy injenerlik tájiribe innovatsiialyq jobasynyń (EPIP – Engineering Practice Innovation Project) standarttaryna sáikes injenerlerdi daiarlaý boiynsha sertifikattalǵan ortalyq bolyp tabylady.
Munda EPIP ádisimen injenerlik praktikalyq jobalardy oqytýǵa arnalǵan kabinet jáne jańa tehnologiialardy ázirleý boiynsha startap-ideialardy ilgeriletý, jańa elektromobil úlgilerin pilottyq testileý maqsatynda stýdenttik ǵylymi-bilim berý úiirmesi qurylǵan.
Ýniversitette «Kólik, kólik tehnikasy jáne tehnologiialary», «Tasymaldaýdy uiymdastyrý, qozǵalys jáne kólikti paidalaný» bilim berý baǵdarlamalary boiynsha dýaldy oqytý júzege asyrylýda. Oqý bazasy – Qostanai oblysyndaǵy iri avtokólik óndirýshi – «Allur» zaýyty.
Qazirgi ýaqytta «SMART Driving Technology» jańa nysanynyń qurylysy júrgizilýde. Sonymen qatar, kelisim aiasynda Qytai seriktesteri tarapynan jalpy quny shamamen 3 mln iýan bolatyn 6 elektromobil, onyń ishinde 2 júrgizýshisiz kólik berilmek.
Ortalyqtyń maqsaty – avtomobil júielerin jetildirý úshin ozyq tehnologiialardy ázirleý jáne engizý. Munda ǵylymi zertteýler júrgizý, intellektýaldy júie tehnologiialaryn oqytý, tehnikalyq mamandardyń biliktiligin arttyrý kýrstaryn uiymdastyrý, sondai-aq Qazaqstan men Ortalyq Aziiada intellektýaldy júie tehnologiialaryn engizý jáne ilgeriletý josparlanýda.
Jumys sapary aiasynda Senatorlar keńesiniń músheleri sondai-aq Óskemen joǵarǵy politehnikalyq kolledjin, «Úlbi metallýrgiialyq zaýyty» AQ men «VOSTOK-MOLOKO» JShS-in aralaidy.
