Qazaqstanda bilik elitasynyń býyny aýysqanymen, kei áýletterdiń yqpaly áli de saqtalyp keledi. Máselen, bir kezderi “Eski Qazaqstanda” joǵary laýazym ielengen saiasatkerler men sheneýnikterdiń ul-qyzdary búginde túrli deńgeidegi basqarma basshysy, ákim orynbasary, tipti halyqaralyq uiymdardaǵy el ókiline deiin kóterilip úlgergen.
Dalanews.kz qazirgi bilik júiesine ornyqqan áýletterge sholý jasady.
Seidýmanovtar áýleti
Álnur Serikuly Seidýmanov — saiasi elitanyń jas býyny. Ol Pavlodar oblysynyń aqparat jáne qoǵamdyq damý basqarmasyn 2024 jyldan beri basqaryp keledi.
Sheneýniktiń ákesi — belgili memleket jáne qoǵam qairatkeri Serik Turaruly Seidýmanov. Ol kezinde Almaty qalasy ákiminiń orynbasary, Májilis depýtaty, sondai-aq QR Bilim jáne ǵylym ministrligine qarasty Filosofiia, saiasattaný jáne dintaný institýtynyń direktory qyzmetterin atqarǵan.
Álnur Seidýmanovtyń eńbek joly elordanyń ishki saiasat júiesinde qalyptasqan. Ol Astana qalasy ákimdigi men Prezident Ákimshiliginde túrli jaýapty qyzmetter atqarǵan.
Manzorovtar áýleti
Astana boiynsha Memlekettik kirister departamentin búginde Serik Baǵdatuly Manzorov basqarady. Ol atalǵan qyzmetke resmi túrde 2025 jyldyń 22 qazanynda taǵaiyndaldy. Serik Manzorov memlekettik organdar men salyq qyzmeti júiesinde uzaq jyl eńbek etti. Eńbek jolyn 2006 jyly Almaty qalasy ákimdiginde bastaǵan.
Ol — Almaty oblysy ákiminiń burynǵy orynbasary Baǵdat Serikuly Manzorovtyń uly. Ákesi kezinde aimaqtyq saiasat pen qurylys salasynda yqpaldy sheneýnik bolǵan, aty birneshe daýly isterde atalǵan. 2020 jyly 30 maýsymda Bas prokýratýra Manzorovqa qatysty “alaiaqtyq” boiynsha is qozǵalǵanyn rastady.
Altynbaevtar áýleti
Muhtar Altynbaevtyń uly — Músilim Altynbaev ta áke jolyn qýǵan sheneýnik. Ol Qazaqstan Respýblikasynyń Qorǵanys ministriniń orynbasary qyzmetin atqarǵan.
Ákesi Muhtar Qapashuly Altynbaev ár jyldary Qazaqstan Respýblikasynyń Qorǵanys ministri, Qorǵanys ministriniń birinshi orynbasary, Qorǵanys ministriniń mindetin atqarýshy qyzmetterin atqarǵan. 2017 jyldyń qazan aiynan bastap “Qarýly Kúshter ardagerleri” respýblikalyq qoǵamdyq birlestiginiń ortalyq keńesin basqaryp keledi.
Imanalievter áýleti
Atyshýly saiasatker, burynǵy joǵary laýazymdy sheneýnik Baqytbek Imanalievtiń uly Jandos Imanaliev búginde Aqordada, iaǵni Prezident Ákimshiliginde jetekshi qyzmet atqarady. Ol 2025 jyly 15 qazanda Prezident Ákimshiliginiń Syrtqy saiasat bóliminiń meńgerýshisi qyzmetine taǵaiyndaldy.
Ákesi kezinde Nur Otan partiiasynyń músheliginde bolyp, Jambyl oblysy ákiminiń orynbasary qyzmetin atqarǵan. Sondai-aq Prezident Ákimshiliginde jumys istegen. Alaida Baqytbek Imanalievtiń mansaby daý-damaimen aiaqtalǵany kópshilikke málim. Ol Memlekettik materialdyq rezervter komitetiniń tóraǵasy qyzmetin atqaryp júrgen kezinde qaramaǵyndaǵylarmen birge 6,5 milliard teńge jymqyrdy degen aiyppen sottalyp, 8 jylǵa bas bostandyǵynan aiyrylǵan. Sonymen qatar oǵan ómir boiy memlekettik qyzmet atqarýǵa tyiym salynyp, Tuńǵysh Prezidenttiń qolynan alǵan marapattary da qaitarylǵan.
Degenmen ol densaýlyq jaǵdaiyna bailanysty jazasyn tolyq ótemei, bir jyl shamasynda ǵana túrmede otyrǵan soń bostandyqqa shyqqan.
Omarovtar áýleti
Belgili jýrnalist Baqytjan Omarov ta eldegi jas býyn sheneýnikterdiń jańa tolqyny. Ol 2025 jyly 17 tamyzda Ál-Farabi atyndaǵy Qazaq ulttyq ýniversitetiniń Basqarma múshesi-áleýmettik damý jónindegi prorektor mindetin atqarýshy laýazymyna taǵaiyndaldy. Buǵan deiin Qyzylorda qalasy ákiminiń orynbasary qyzmetin atqarǵan edi. Eńbek jolyn 2008 jyly «Qazaqstan» teleradiokorporatsiiasynda redaktor retinde bastaǵan ol, keiin «Habar 24» telearnasynyń bas redaktory, Túrkiiadaǵy TÚRKSOI uiymynda Qazaqstannyń ókili, Qyzylorda oblysy ákiminiń baspasóz hatshysy, Qyzylorda qalasy ákiminiń orynbasary qyzmetterin atqarǵan.
Al ákesi - belgili qoǵam jáne memleket qairatkeri Baýyrjan Jumahanuly Omarov. Ol 2019 jyly Qazaqstan Respýblikasy Prezidentiniń keńesshisi qyzmetine taǵaiyndalǵan. Buǵan deiin Baýyrjan Omarov elimizdiń aqparattyq jáne ideologiialyq saiasatynyń qalyptasýyna eleýli úles qosqan tulǵa retinde tanylǵan.
Orazalinder áýleti
Almaty qalasy Medeý aýdanynyń ákimi Erkebulan Orazalin de jańa býyn sheneýnikterdiń ishinde saiasi minberde jii kórinip júrgen jas basshylardyń biri. Ol — Memlekettik syilyqtyń iegeri, Qazaqstan Jazýshylar odaǵyn 22 jyl boiy basqarǵan aqyn Nurlan Orazalinniń uly.
Sonymen qatar Erkebulan Nurlanuly Almaty qalalyq Kásipkerlik jáne investitsiialar basqarmasynyń basshysy, Áýezov aýdany ákiminiń orynbasary qyzmetterin de atqarǵan.
Sadanovtar áýleti
Arman Amangeldiuly Sadanov politsiia general-maiory, Jetisý oblysy politsiia departamenti bastyǵy qyzmetin atqarady. Buǵan deiin ol IIM ózindik qaýipsizdik departamentin basqarǵan. Qazaqstannyń qaýipsizdik qurylymynda uzaq jyl eńbek etken Arman Sadanovbelgili ǵalym, mikrobiologiia salasynyń maitalmany, Qazaqstan Respýblikasy Bilim jáne ǵylym ministrligi Ǵylym komitetiniń Mikrobiologiia jáne virýsologiia institýtynyń burynǵy bas direktory Amankeldi Qurbanuly Sadanovtyń uly.
Ábilqasymovtar áýleti
Saiasi ortada Ábilqasymovtar áýletiniń izin Qarjy naryǵyn retteý jáne damytý agenttiginiń tóraiymy Madina Ábilqasymova jalǵastyryp keledi. Buǵan deiin ol Eńbek jáne halyqty áleýmettik qorǵaý ministri (2018–2019) qyzmetin atqardy. 2019 jyly 12 naýryzda ol Ulttyq ekonomika ministriniń birinshi orynbasary bolyp taǵaiyndalǵanymen, nebári 16 kúnnen soń, 28 naýryzda qyzmetinen ketti.
Mádina Ábilqasymovanyń saiasi joly kezdeisoq bastalǵan joq. Ol - qoǵam qairatkeri, májilis depýtaty, Qazaqstan Prezidenttigine kandidat bolǵan Erasyl Ábilqasymovtyń qyzy.
Sondai-aq jary Nurlan Ábdirahym da saiasi minberde tóbe kórsetip júrgen sheneýnik. Jaqynda ol Almaty qalasy ákiminiń orynbasary qyzmetine taǵaiyndalǵan edi. Ábdirahym bul qyzmetke deiin 2023 jyldyń sáýirinen bastap Almaty oblysy ákiminiń birinshi orynbasary qyzmetin atqarǵan. Sondai-aq Prezident Ákimshiliginde memlekettik inspektory, bólim meńgerýshisiniń orynbasary qyzmetterinde de bolǵan.
Smatlaevtar áýleti
Memlekettik qyzmet salasynda esimi jii aitylyp júrgen kelesi sheneýnik — Almashan Smatlaev. Ol 2025 jyly 18 tamyzda Almaty qalasynyń ákimi Darhan Satybaldynyń ókimimen jáne Qazaqstan Respýblikasy Prezidenti Ákimshiliginiń kelisimimen Almaty qalasy ákiminiń orynbasary bolyp taǵaiyndaldy. Almashan Smatlaev eńbek jolyn 2009 jyly jeke sektorda, biznes qurylymdarda bastap, keiin Eýraziialyq ekonomikalyq komissiiadaqyzmet atqardy. 2014–2023 jyldar aralyǵynda ol Shyǵys Qazaqstan oblysynda ekonomika jáne biýdjettik josparlaý basqarmasyn basqardy, sondai-aq oblys ákiminiń orynbasary jáne birinshi orynbasary syndy jaýapty laýazymdarda eńbek etti. Budan soń ol Qazaqstan Respýblikasy Prezidenti Ákimshiliginiń memlekettik inspektory qyzmetinde de tájiribe jinaqtady.
Onyń ákesi — Baýyrjan Smatlaev, Atyraý oblysynyń burynǵy prokýrory, zań ǵylymdarynyń doktory, professor, Qazaqstan Respýblikasynyń prokýratýra organdarynyń qurmetti qyzmetkeri.
Zakievter áýleti
Kelesi sheneýnik — Dinara Zakieva. Ol 2023 jylǵy 16 maýsymnan bastap Qazaqstan Respýblikasyndaǵy Bala quqyqtary jónindegi ýákili qyzmetin atqaryp keledi. Buǵan deiin, 2021–2023 jyldary Parlament Májilisiniń depýtaty bolǵan.
Ol bala quqyǵyn qorǵaý, áleýmettik saiasat jáne qoǵamdaǵy osal toptardyń múddesin ilgeriletý baǵytynda belsendi qyzmet etip júrgen zamanaýi býyn ókili.
Mundai azamattyq ustanymnyń qalyptasýyna onyń shyqqan áýletiniń de áseri mol. Dinaranyń ákesi — Bolat Seiitqazyuly Zákiev, qaýipsizdik jáne memlekettik qyzmet salasynda elge tanylǵan tulǵa. Ol — QR Ulttyq qaýipsizdik komiteti tóraǵasynyń orynbasary, Shekara qyzmetiniń direktory (1999–2008), general-leitenant, sondai-aq KNB joǵary basshylyq quramynyń ókili bolǵan.
Sonymen qatar Dinara Zakieva — belgili zańger, qoǵam qairatkeri Talǵat Maqsutuly Nárikbaevtyń jubaiy. Ol 2008 jyldan beri M.S. Nárikbaev atyndaǵy KAZGIýÝ ýniversiteti AQ basqarma tóraǵasy qyzmetin atqaryp keledi.
Abrahmanovtar áýleti
Qazaqstannyń diplomatiialyq korpýsynda abyroily qyzmet etip júrgen tulǵalardyń biri — Asqar Saýytbekuly Abdrahmanov. 2023 jyldyń 14 tamyzynan bastap ol IýNESKO jáne ózge de halyqaralyq uiymdar janyndaǵy Qazaqstan Respýblikasynyń Turaqty ókiliretinde Parij qalasynda elimizdiń múddesin qorǵap keledi.
Asqar Abdrahmanov halyqaralyq qatynastar salasynda mol tájiribesimen erekshelenedi. Buǵan deiin ol Qazaqstannyń IýNESKO janyndaǵy turaqty ókiliniń orynbasary (2018–2020) jáne Syrtqy ister ministrliginiń Halyqaralyq aqparat komitetiniń tóraǵasy(2020–2022) qyzmetterin atqarǵan.
Onyń ákesi — Saýytbek Abdrahmanov, elimizdiń aqparat jáne saiasat keńistiginde keńinen tanymal tulǵa, QR Parlamenti Májilisiniń burynǵy depýtaty, sondai-aq uzaq jyldar boiy respýblikalyq “Egemen Qazaqstan” gazetiniń prezidenti qyzmetin atqarǵan.
