Sý resýrstary jáne irrigatsiia ministri Nurjan Nurjigitov «Gidrotehnikalyq qurylys, kólik infraqurylymy, ekologiialyq injiniring jáne taý-ken óndirý salasyndaǵy innovatsiialyq tehnologiialardy damytý» taqyrybyndaǵy halyqaralyq konferentsiiaǵa qatysty. Is-sharany QazInnovations innovatsiialardy damytý jónindegi ulttyq agenttigi Sý resýrstary jáne irrigatsiia ministrligimen birlese jáne nemistiń HUESKER kompaniiasynyń qatysýymen uiymdastyrdy, dep habarlaidy Dalanews.kz.
Konferentsiiada kompaniia ókilderi gidrotehnikalyq qurylys, kólik infraqurylymy, ekologiialyq injiniring jáne taý-ken óndirisi salalaryndaǵy jańa tehnologiialar jaily baiandap berdi.
«Sý sharýashylyǵyndaǵy innovatsiialar – bul tek tehnologiia máselesi emes, bul azyq-túlik qaýipsizdigine, agrarlyq sektordyń turaqtylyǵyna jáne tabiǵi resýrstardy utymdy basqarýǵa tikelei bailanysty másele. Klimattyń ózgerýi bizden múlde jańa, zamanaýi ári tiimdi sheshimderdi talap etedi. Qazir Qazaqstan sý sharýashylyǵy salasynyń mańyzdy damý kezeńinde tur. Biz bul baǵytta aýqymdy transformatsiia júrgizip jatyrmyz. Negizgi basymdyq – normativtik-quqyqtyq bazany jetildirý, sý infraqurylymyn jańǵyrtý, sý únemdeý tehnologiialaryn engizý jáne transshekaralyq yntymaqtastyqty damytý», – dedi Sý resýrstary jáne irrigatsiia ministri Nurjan Nurjigitov.
Sý resýrstary jáne irrigatsiia ministrligi nemis kompaniiasymen burynnan tájiribe almasyp keledi. Jambyl oblysy Baizaq aýdanyndaǵy «Ótemis» kanalynda INCOMAT geotekstil materialyn engizý boiynsha pilottyq joba tabysty nátije kórsetti. Materialdyń jumys tiimdiligi naqty jaǵdaida dáleldendi. Atap aitqanda, joba nátijesinde maýsym sońynda sý shyǵynynyń azaiǵany jáne sý resýrstaryn basqarýdyń tiimdiligi artqany baiqaldy. Sonymen qatar júie syrtqy áserlerge tózimdiligimen jáne tehnikalyq qyzmet kórsetý yńǵailylyǵymen erekshelendi. Pilottyq jobanyń oń nátijeleri bul tehnologiiany basqa kanaldarda da qoldanýdyń maqsatqa sai ekenin dáleldedi.
