سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ «گيدروتەحنيكالىق قۇرىلىس، كولىك ينفراقۇرىلىمى، ەكولوگيالىق ينجينيرينگ جانە تاۋ-كەن ءوندىرۋ سالاسىنداعى يننوۆاسيالىق تەحنولوگيالاردى دامىتۋ» تاقىرىبىنداعى حالىقارالىق كونفەرەنسياعا قاتىستى. ءىس-شارانى QazInnovations يننوۆاسيالاردى دامىتۋ جونىندەگى ۇلتتىق اگەنتتىگى سۋ رەسۋرستارى جانە يرريگاسيا مينيسترلىگىمەن بىرلەسە جانە نەمىستىڭ HUESKER كومپانياسىنىڭ قاتىسۋىمەن ۇيىمداستىردى، دەپ حابارلايدى Dalanews.kz.
كونفەرەنسيادا كومپانيا وكىلدەرى گيدروتەحنيكالىق قۇرىلىس، كولىك ينفراقۇرىلىمى، ەكولوگيالىق ينجينيرينگ جانە تاۋ-كەن ءوندىرىسى سالالارىنداعى جاڭا تەحنولوگيالار جايلى بايانداپ بەردى.
«سۋ شارۋاشىلىعىنداعى يننوۆاسيالار – بۇل تەك تەحنولوگيا ماسەلەسى ەمەس، بۇل ازىق-تۇلىك قاۋىپسىزدىگىنە، اگرارلىق سەكتوردىڭ تۇراقتىلىعىنا جانە تابيعي رەسۋرستاردى ۇتىمدى باسقارۋعا تىكەلەي بايلانىستى ماسەلە. كليماتتىڭ وزگەرۋى بىزدەن مۇلدە جاڭا، زاماناۋي ءارى ءتيىمدى شەشىمدەردى تالاپ ەتەدى. ءقازىر قازاقستان سۋ شارۋاشىلىعى سالاسىنىڭ ماڭىزدى دامۋ كەزەڭىندە تۇر. ءبىز بۇل باعىتتا اۋقىمدى ترانسفورماسيا جۇرگىزىپ جاتىرمىز. نەگىزگى باسىمدىق – نورماتيۆتىك-قۇقىقتىق بازانى جەتىلدىرۋ، سۋ ينفراقۇرىلىمىن جاڭعىرتۋ، سۋ ۇنەمدەۋ تەحنولوگيالارىن ەنگىزۋ جانە ترانسشەكارالىق ىنتىماقتاستىقتى دامىتۋ»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
سۋ رەسۋرستارى جانە يرريگاسيا مينيسترلىگى نەمىس كومپانياسىمەن بۇرىننان تاجىريبە الماسىپ كەلەدى. جامبىل وبلىسى بايزاق اۋدانىنداعى «وتەمىس» كانالىندا INCOMAT گەوتەكستيل ماتەريالىن ەنگىزۋ بويىنشا پيلوتتىق جوبا تابىستى ناتيجە كورسەتتى. ماتەريالدىڭ جۇمىس تيىمدىلىگى ناقتى جاعدايدا دالەلدەندى. اتاپ ايتقاندا، جوبا ناتيجەسىندە ماۋسىم سوڭىندا سۋ شىعىنىنىڭ ازايعانى جانە سۋ رەسۋرستارىن باسقارۋدىڭ تيىمدىلىگى ارتقانى بايقالدى. سونىمەن قاتار جۇيە سىرتقى اسەرلەرگە توزىمدىلىگىمەن جانە تەحنيكالىق قىزمەت كورسەتۋ ىڭعايلىلىعىمەن ەرەكشەلەندى. پيلوتتىق جوبانىڭ وڭ ناتيجەلەرى بۇل تەحنولوگيانى باسقا كانالداردا دا قولدانۋدىڭ ماقساتقا ساي ەكەنىن دالەلدەدى.
