Búgin Qyzylorda oblysynyń ákimi Nurlybek Nálibaev qazaqtyń kórnekti aqyny, qoǵam qairatkeri, Qazaqstannyń Eńbek Eri Muhtar Shahanovpen kezdesti, - dep habarlaidy Dalanews.kz
Aimaq basshysy Syr óńirine arnaiy saparmen kelgen aqynǵa alǵys bildirip, rýhaniiat pen mádenietke qosqan eńbegin erekshe atap ótti.
«Eń aldymen, Muhtar aǵa, Memleket basshysynyń Jarlyǵymen Qazaqstannyń Eńbek Eri atanýyńyzben shyn júrekten quttyqtaimyn. Bul ataq egemen elimizdiń rýhani-mádeni damýyna qosqan ólsheýsiz eńbegińizge berilgen laiyqty baǵa dep bilemiz. Sizdiń qalamyńyzdan týǵan «Jubailar jyry», «Týǵan kún keshinde», «Gúl dáýren», «Men saǵan ǵashyq edim» sekildi taǵy da basqa kóptegen týyndylaryńyz qalyń jurtshylyqqa keńinen tarap, júrekterden óshpestei oryn aldy. Shyǵarmalaryńyz 50-den astam tilge aýdarylyp, respýblikamyzdyń, shet elderdiń teatrlarynda qoiylyp keledi. Ult rýhaniiatyna qosqan zor úlesińiz úshin «Otan» ordeni, Qazaqstannyń Halyq jazýshysy, Qyrǵyz Respýblikasynyń halyq aqyny, taǵy basqa ataq pen marapattar ielendińiz. Ózińizge degen Syr halqynyń qurmeti, iltipaty árqashan da erekshe. Shyǵarmashylyq saparyńyzǵa qutty qadam, denińizge saýlyq, otbasyńyzǵa amandyq tileimin. Ǵasyr jasańyz!», – dedi aimaq basshysy.
Búgin Syr jurtshylyǵy aqynnyń «Tanakóz» shyǵarmasynyń jelisimen qoiylǵan spektakldi Ázerbaijan Mámbetov atyndaǵy memlekettik drama jáne komediia teatrynyń sahnalaýynda tamashalaidy.
Kezdesý sońynda aimaq basshysy Muhtar Shahanov pen jubaiy Hanshaiym Kókenqyzyna Syr eli atynan iltipat bildirip, qurmet kórsetti.
Sondai-aq, búgin Jastar resýrstyq ortalyǵynda Muhtar Shahanovtyń jastarmen taǵylymdy kezdesýi ótti. Oǵan qatysýshylar aqynnyń rýhty, ómirsheń jyrlaryn, ózderiniń arnaý óleńderin oqydy. Erkin suqbat quryp, suraq-jaýap formatynda áńgime órbitti.
