Búgin «Óner ortalyǵynda» Qyzylorda oblysynyń ákimi Murat Ergeshbaevtyń qatysýymen Mádeniet jáne óner qyzmetkerleri kúnine arnalǵan saltanatty shara ótti. Jiynǵa sala ardagerleri, óner maitalmandary jáne ziialy qaýym ókilderi qatysty, dep habarlaidy dalanews.kz.
Halqymyzdyń rýhani murasyn saqtap, erteńge sabaqtastyrý – memlekettik saiasattyń basym baǵyttarynyń biri. Eldigimizdiń rýhaniiat bairaǵyn kótergen mádeniet jáne óner qyzmetkerleri Qorqyt ata murasyn, jyraýlar jádigerin, talanttar tarihyn jalǵap, halyq qoshemetine bólenip keledi.
Memleket basshysynyń, Úkimettiń qoldaýymen óńirde 200-den astam áleýmettik nysan salyndy. Onyń 22-si – mádeniet nysany. Atap aitqanda, barlyq aýdanda «Rýhaniiat ortalyqtary» boi kóterse, Qyzylordada «Óner ortalyǵy», «Anaǵa taǵzym» jáne «Otbasy ortalyǵy» el igiligine qyzmet etýde. Tarihi-ólketaný mýzeiiniń, «Dostyq úiiniń» jańa ǵimarattary ashyldy. Balalardyń shyǵarmashylyq jáne ziiatkerlik qabiletin damytý maqsatynda «Oqýshylar saraiy» men «Syr juldyzdary» akademiiasy iske qosyldy.
Búginde Qyzylordada Memleket basshysynyń Ulttyq quryltaida bergen tapsyrmasyna sáikes jańa drama teatr men Prezidenttik kitaphana qurylysy júrip jatyr.
Salaǵa biyldyń ózinde 6 mlrd teńgeden astam qarjy bólindi.
Murat Nálqojauly óz sózinde mádeniet pen rýhaniiattyń qoǵam ómirindegi airyqsha mańyzyn atap ótti.
«Memleket basshysy Qasym-Jomart Kemeluly: «Mádeniet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi», – degen bolatyn.
Eldiń rýhani tiregin nyqtap, ulttyń uly murasyn saqtaýda aianbai eńbek etip júrgen barsha mádeniet qyzmetkerlerine Syr jurtshylyǵy atynan shynaiy rizashylyǵymdy bildiremin.
Óner men rýhaniiattyń órisi keńeiip, mádenietimizdiń mártebesi árdaiym biik bolsyn! Elimizdiń rýhani damýyna qosyp júrgen eńbekterińiz jemisti bolyp, shyǵarmashylyq tabystaryńyz arta bersin.
Sizderge zor densaýlyq, shalqar shabyt, otbasylaryńyzǵa amandyq pen baq-bereke tileimin. Qazaqtyń qasietti óneri men mádenieti urpaq sanasynda máńgi jańǵyra bersin!», – dedi aimaq basshysy.
Merekelik sharada saladaǵy asa úzdik jetistikteri jáne elge sińirgen airyqsha eńbegi úshin birqatar azamat «Qurmet» ordenimen, Mádeniet jáne aqparat ministrliginiń «Eńbek ardageri», «Mádeniet salasynyń úzdigi» tósbelgilerimen, Qurmet gramotasy jáne Alǵys hatpen marapattaldy.
Sonymen qatar sala mamandaryna QR Premer-ministriniń birinshi orynbasary Nurlybek Nálibaevtyń Alǵys haty berilip, olardyń el mádenietiniń órkendeýi jolyndaǵy eńbegi joǵary baǵalandy.
Syr eliniń rýhani-mádeni damýyna qosqan úlesi úshin birqatar azamatqa oblystyń Qurmet gramotasy jáne oblys ákiminiń Alǵys haty tabystaldy. Ádebiet pen óner salasynda erekshe qoltańbasymen tanylǵan shyǵarmashylyq ókilderine jyl saiyn beriletin oblys ákiminiń dástúrli «Turan» syilyǵyna biyl 19 adam ie boldy.
Kásibi merekede sahnada Turmaǵambet atyndaǵy halyq aspaptar orkestri, «Tomiris» bi, «Qorqyt sazy» qobyzshylar, Qorqyt ata atyndaǵy Qyzylorda ýniversitetiniń qyzdar vokaldy ansamblderi, Qazanǵap atyndaǵy mýzykalyq joǵary kolledjiniń baianisteri, Qarakóz Aqdáýletova atyndaǵy balalar stýdiiasy jáne «Syr sandýǵashtary» balalar vokaldy toby, kameralyq hor ujymy, klassikalyq ánder sherýimen Eýropanyń talǵampaz kórermeniniń ystyq yqylasyna bólengen ánshiler óner kórsetti.
Is-shara barysynda qatysýshylar arnaiy uiymdastyrylǵan kórmeni aralap kórdi. Kórmege óńirdiń rýhani-mádeni bolmysyn tanytatyn qundy eksponattar, qolóner sheberleriniń týyndylary, tarihi jádigerler jáne jergilikti ónerpazdardyń shyǵarmashylyq jumystary qoiylyp, kópshilik nazaryna usynyldy.
