Mektep direktory ári áleýmettik jelide tanymal ustaz Aqmonshaq Nurtaza densaýlyǵyna bailanysty aýrýhanaǵa túskenin aitty. Ol bul týraly Instagram paraqshasynda jazyp, oqý jylynyń sońyna deiin shydai almai aýyrǵanyn jetkizdi, dep habarlaidy dalanews.kz.
"Oqý jylynyń sońyna jete almai, aýyryp qalyppyn. Biraq shúkir, keremet dárigerlerdiń qolyna tústim. Sizderdiń aq tilekterińiz ben duǵalaryńyzdyń arqasynda tezirek saýyǵyp ketemin dep senemin", – dep jazdy ol.
Aqmonshaq Nurtaza sońǵy úsh jylda ózin keiinge ysyryp, densaýlyǵyna jetkilikti kóńil bólmegenin de ashyq aitty. Onyń sózinshe, direktorlyq qyzmetke kiriskennen beri jumysty birinshi orynǵa qoiyp, dárigerge qaralýǵa ýaqyt tappaǵan.
"Direktor bolǵanyma 3 jyl bolypty. Osy ýaqyt ishinde ózimdi keiinge ysyryp, dárigerge qaralýǵa ýaqyt tappadym. Únemi jumysty, ýaqytty syltaý ettim. Biraq densaýlyq kútpeidi eken", – dedi ol.
Ustaz oqyrmandaryna óz densaýlyǵyna beijai qaramaýǵa keńes berdi. Onyń aitýynsha, adam eń aldymen ózine, sodan keiin otbasy men jaqyndaryna kerek.
Sonymen qatar Aqmonshaq Nurtaza dárigerlerge alǵys aityp, narkozben jasalǵan zertteýden keiin jaǵdaiy jaqsy ekenin jetkizdi.
"Densaýlyq – bárinen qymbat. Aýyrmańyzdar. Dárigerlerge erekshe respekt. Biz, ustazdar, keide jumysymyzdy qiyn sanaimyz, biraq dárigerlerdiń eńbegine bas iemin. Aman bolyńyzdar, aq halatty abzal jandar", – dep jazdy ol.
