Parijde ótken Dúniejúzilik janýarlar densaýlyǵy uiymynyń (DJDU) 93-bas sessiiasynda Qazaqstanǵa aýsylǵa qarsy vaktsinatsiialanǵan taza aimaq mártebesi berildi, dep habarlaidy dalanews.kz.
Resmi sertifikat Qazaqstan delegatsiiasyna tabystaldy. Osylaisha, DJDU halyqaralyq standarttaryna sáikes elimizdiń búkil aýmaǵy aýsyl aýrýynan taza aimaq retinde tanyldy. Shyǵys jáne Ortalyq Aziia elderiniń ishinde mundai mártebege Qazaqstan ǵana ie boldy.
Bul nátije 2024 jyldan beri júrgizilgen veterinariialyq qaýipsizdik sharalarynyń qorytyndysy retinde baǵalanyp otyr. Elde epizootiialyq ahýaldy turaqty saqtaý, veterinariialyq baqylaýdy kúsheitý, biologiialyq qaýipsizdikti jetildirý jáne monitoring júiesin damytý baǵytynda keshendi jumystar júrgizilgen.
«Qazaqstan halyqaralyq deńgeide moiyndalǵan epizootiialyq qaýipsizdik júiesin dáiekti túrde nyǵaityp, ulttyq veterinariialyq qaýipsizdiktiń deńgeiiniń joǵary ekenin taǵy bir márte dáleldep otyr. Búginde elimizdiń búkil aýmaǵy aýsylǵa qarsy vaktsinatsiialanǵan taza halyqaralyq aimaqtarmen qamtyldy. Bul el úshin úlken jetistik», – dedi Aýyl sharýashylyǵy ministri Aidarbek Saparov.
Ministrdiń aitýynsha, bul mártebe Qazaqstannyń halyqaralyq bedelin kúsheitip, sheteldik seriktesterdiń senimin arttyrýǵa jáne mal sharýashylyǵy ónimderiniń eksportyn keńeitýge múmkindik beredi.
Saparov sondai-aq Qazaqstan jyl saiyn afrikalyq jylqy obasy men klassikalyq shoshqa obasy boiynsha qaýipsiz mártebesin dáleldep kele jatqanyn aitty.
Sessiia aiasynda qazaqstandyq delegatsiia halyqaralyq veterinariia, biologiialyq qaýipsizdik jáne transshekaralyq aýrýlardyń aldyn alý máselelerin talqylady. Sonymen qatar Aýyl sharýashylyǵy ministri Aidarbek Saparov DJDU bas direktory Emmanýel Sýbeiranmen kezdesý ótkizdi.
«Qazaqstan veterinariialyq qyzmetti damytýda, halyqaralyq standarttardy engizýde jáne Ortalyq Aziiadaǵy óńirlik yntymaqtastyqty nyǵaitýda júieli jumys júrgizip keledi», – dep atap ótti Emmanýel Sýbeiran.
Uiym basshysy Qazaqstannyń ǵylymi-diagnostikalyq áleýetin damytý men veterinariialyq qyzmetti jańǵyrtý tájiribesine joǵary baǵa berip, ony halyqaralyq deńgeide tanystyrýdy usyndy.
Aita keteiik, Aidarbek Saparov DJDU ministrlik dóńgelek ústeli men Bas sessiiasynda sóz sóilegen Ortalyq Aziiadaǵy jalǵyz aýyl sharýashylyǵy ministri boldy.
