Qazaqstan Premer-ministri Oljas Bektenov Ashhabadta ótken Táýelsiz Memleketter Dostastyǵy Úkimet basshylary keńesiniń otyrysyna qatysty, dep habarlaidy dalanews.kz.
Jiyn qorytyndysynda mańyzdy sheshimderdiń biri qabyldanyp, 2028 jyly Qaraǵandy TMD jastarynyń astanasy bolyp jariialandy.
Tiisti sheshim TMD elderi úkimet basshylarynyń keńeitilgen otyrysynda qabyldandy. Oǵan sáikes, 2027 jyly bul mártebe Minskige berilse, 2028 jyly halyqaralyq jastar jobasyn Qaraǵandy qabyldaidy.
Ashhabadtaǵy kezdesý aiasynda Oljas Bektenov Túrikmenstan Prezidenti Serdar Berdimuhamedovpen jáne Túrikmenstan Halk Maslahatynyń tóraǵasy Gýrbangýly Berdimuhamedovpen kezdesip, Qazaqstan Prezidenti Qasym-Jomart Toqaevtyń sálemin jetkizdi.
Taraptar saýda-ekonomikalyq bailanys, kólik-tranzittik baǵyttar, energetika jáne aýyl sharýashylyǵy máselelerin talqylady.
Biylǵy jyldyń alǵashqy toqsanynda Qazaqstan men Túrikmenstan arasyndaǵy ózara saýda kólemi 125,3 mln dollarǵa jetti. Bul rette qazaqstandyq aýyl sharýashylyǵy ónimderiniń eksporty esebinen jetkizilim kólemi 15 paiyzǵa artqan.
Otyrys barysynda TMD elderiniń tsifrlyq transformatsiiasy, taý-ken metallýrgiia keshenin jańǵyrtý, logistika, jasandy intellekt, sý qaýipsizdigi jáne kólik dálizderin damytý máseleleri kóterildi.
Oljas Bektenov Qazaqstannyń TMD memleketterimen ekonomikalyq bailanysy ósip kele jatqanyn aitty. Onyń málimetinshe, 2025 jyldyń qorytyndysy boiynsha Qazaqstannyń TMD elderimen taýar ainalymy 38,4 mlrd dollardy quraǵan. Al 2026 jyldyń qańtar-naýryz ailarynda ózara saýda kólemi taǵy 17,1 paiyzǵa ósken.
Jiyn qorytyndysynda taý-ken metallýrgiiasy, radionavigatsiia, kólik infraqurylymy, tsifrlandyrý jáne ýran óndirisinen zardap shekken aýmaqtardy qalpyna keltiý boiynsha birqatar qujattarǵa qol qoiyldy.
