Biyl Astanada 173-ke jýyq qoǵamdyq jáne aýla keńistigin abattandyrý, sondai-aq 1,1 millionnan astam jasyl jelek (kóshetter, butalar, gúlder men aǵashtar) otyrǵyzý josparlanyp otyr. Elordanyń barlyq aýdanynda jaily qalalyq ortany qurý boiynsha aýqymdy jáne jergilikti jobalardy iske asyrý jalǵasady, dep habarlaidy dalanews.kz.
Negizgi jobalardyń qatarynda «Myńjyldyq» alleiasyndaǵy úsh nysandy iske asyrý, Greenline jaiaý júrginshiler býlvarynyń ekinshi kezeńiniń qurylysyn jalǵastyrý, sondai-aq jergilikti qoǵamdyq keńistikterdi damytý bar. Jańa qalalyq keńistikter, gúlzarlar men promenadtar elorda turǵyndary men qonaqtary úshin qosymsha tartymdy ortalyqtary men demalys oryndaryna ainalady.
Saryarqa aýdanynda bos jatqan jerlerdiń, buzylǵan garajdar men eski úilerdiń ornynda 4 jańa gúlzar ashylady. Iri jobalardyń biri A. Úlimjiuly kóshesiniń boiynda iskk asyp jatyr, onda landshaftyq dizainy bar zamanaýi demalys aimaǵy qurylyp jatyr. Sondai-aq 11 aýla aýmaǵynda jumys júrgizilýde, al jalpy osy maýsymda 30-ǵa jýyq aýlany kúrdeli jóndeýden ótkizý josparlanǵan. Sonymen qatar Kenesary kóshesin qaita jańartý jumysy qyzý júrip jatyr.
Almaty aýdanynda negizgi nazar B. Momyshuly, Sh. Qudaiberdiuly dańǵyldaryn jáne Sharl de Goll kóshesin qaita jańartýǵa qoiylǵan. Bul jerlerde jańa gúlzarlar, sporttyq keńistikter men jasyl aimaqtar ashylady. Sondai-aq «Alma» jáne «Jalaiyri» gúlzarlary, Temirjolshylar turǵyn alabyndaǵy aýmaqtar jańartylady. «Halyq qatysatyn biýdjet» baǵdarlamasy boiynsha 9 aýla modernizatsiialanady. 28 aýlada jóndeý-qalpyna keltirý jumysy júrgizildi, jalpy aýdanda 50 aýla aýmaǵyn jańartý josparlanyp otyr.
Esil aýdanynda «Halyq qatysatyn biýdjet» baǵdarlamasy boiynsha bes turǵyn úi kesheniniń aýlasy jańartylady: «Adina», «Venskii kvartal», «Arman qala 4», «Arman qala 5» jáne «Lazýrnyi kvartal». Bul jerlerde zamanaýi balalar jáne sport alańdary, jaryqtandyrý, oryndyqtar ornatylyp, kógaldandyrý jumysy júrgiziledi.
Baiqońyr aýdanynda biyl 70 aýla abattandyrylady. Onyń ishinde 20 aýmaq oiyn keshenderin, trenajerler men demalys aimaqtaryn ornata otyryp, keshendi modernizatsiialaýdan ótedi. Bul jobalardyń basym bóligi 12 aýla «Halyq qatysatyn biýdjet» baǵdarlamasy arqyly turǵyndardyń óz bastamasymen iske asyrylyp jatqanyn atap ótken jón. Taǵy 50 aýla jóndeý jumystarymen qamtylǵan. Alǵashqy 6 jańartylǵan aýla mamyr merekelerine qarai ashylyp úlgerdi.
Nura aýdanynda ekoortany jáne jaiaý júrginshiler infraqurylymyn damytý negizgi baǵyt bolyp otyr. Ekoparkte belsendi jumys júrgizilýde: daiyndyq kezeńi aiaqtalyp, qurylys-montajdaý jumysy bastaldy. Greenline jelekjolynyń ekinshi kezeńin iske asyrý jalǵasýda, Astanalyq tsirkiniń aýmaǵy men jańa qoǵamdyq keńistikter abattandyrylyp jatyr. Jańa nysandardyń biri «QazMunaiGaz» gúlzary bolmaq. Sondai-aq «Altyn Shar-1», «Madrid» jáne «Kopengagen» turǵyn úi keshenderiniń mańynda jumystar júrgizilýde. «Halyq qatysatyn biýdjet» baǵdarlamasy boiynsha aýdanda 6 aýla jańartylady.
Saraishyq aýdanynda R. Qoshqarbaev dańǵylyn abattandyrý jalǵasýda, onda zamanaýi promenad qurylyp jatyr. Munda iri aǵashtar men gúldeitin butalar otyrǵyzylady, sondai-aq aýmaqty jaryqtandyrý jumysy júrgizilýde. «Halyq qatysatyn biýdjet» baǵdarlamasy boiynsha keshendi abattandyrýmen 13 aýlany qamtý, sonymen qatar 30 aýlada aǵymdaǵy jóndeý jumysyn júrgizý josparlanyp otyr.
Sondai-aq aýdanda eskertkishterdiń mańynda, parktik aimaqtarda jáne konteinerlik alańdarda qalpyna keltirý jumysy júrgizilip jatyr.
Osylaisha, elordada jaily qoǵamdyq keńistikter qurý, kógaldandyrý jáne zamanaýi qalalyq infraqurylymdy damytý boiynsha júieli jumys júrip jatyr.
