Qazaqstan Respýblikasynyń Memlekettik keńesshisi – Qazaqstannyń IýNESKO jáne ISESKO isteri jónindegi ulttyq komissiiasynyń tóraǵasy Erlan Qarin Ózbekstan Respýblikasynyń Samarqand qalasynda ótip jatqan Birikken Ulttar Uiymynyń Bilim, ǵylym jáne mádeniet máseleleri jónindegi Bas konferentsiiasynyń (IýNESKO) 43-shi sessiiasynda sóz sóiledi dep habarlaidy Dalanews.kz. Aqorda-ǵa silteme jasap.
Memlekettik keńesshi óz baiandamasynda Qazaqstan Prezidenti Qasym-Jomart Toqaevtyń BUU Bas Assambleiasynyń 80-shi sessiiasynda senimge, ashyqtyqqa, jaýapkershilik pen ádildikke negizdelgen jańa jahandyq konsensýsty qalyptastyrýǵa shaqyrǵanyn atap ótti. Osy oraida ol IýNESKO-nyń mańyzy arta túskenin aityp, Islam áleminiń bilim, ǵylym jáne mádeniet uiymymen (ICESCO) halyqaralyq yntymaqtastyqty nyǵaitýǵa shaqyrdy.
– IýNESKO men ICESCO ortaq maqsattardy kózdeidi. Eki uiymnyń yntymaqtastyǵyn nyǵaitý mádenietter arasynda shynaiy seriktestik qurýǵa jáne olardyń oń áserin odan ári arttyrýǵa múmkindik beredi. Birlesken kúsh-jigerdiń nátijesinde ǵana ortaq mádeni muramyzdyń bar bailyǵy men ártúrliligin saqtaitynymyzǵa senimdimiz. Biz birlesip ádil, sanaly ári meiirimdi álemdi quratyn bolamyz, – dedi ol.
Memleket basshysynyń biylǵy Joldaýynda aitylǵan Qazaqstandy odan ári jańǵyrtýdyń jańa qadamdary E.Qarin baiandamasynyń negizgi ózegi boldy. Bul eń aldymen ekonomikanyń túrli salalaryna jasandy intellektini jappai engizý jáne tsifrlandyrýdy keń kólemde damytýdy qamtidy. Qazaqstan bolashaqta tehnologiialyq turǵydan damyǵan memleket atanýdy kózdeidi.
– Qazaqstan tsifrlandyrý men jasandy intellekt quraldaryn jedeldetip engizýde keshendi ári júieli sheshimder qabyldaǵan álemdegi alǵashqy elderdiń biri bolyp otyr. Qazaqstan Prezidenti tsifrlyq transformatsiia men jasandy intellektini engizýdi jańa ulttyq ideia retinde aiqyndap berdi, – dedi Erlan Qarin.
