Qazaqstanda Qyrǵyzstannan kelgen eki apaly- sińlilerdi, onyń biri kámeletke tolmaǵan qyzdy kúshtep ustaǵan dep habarlaidy Dalanews.kz. 24.kg saityna silteme jasap.
Qyrǵyzstan Ombýdsmen institýtynyń málimetinshe, aidyń basynda Osh oblysynan qyzdardyń anasy kómek surap júgingen. Onyń aitýynsha, 2024 jyldyń naýryz aiynda K.K. esimdi azamatsha onyń 16 jáne 18 jastaǵy qyzdaryn jumys beremin dep ýáde berip, Shymkentke alyp ketken. Alaida biraz ýaqyttan keiin qyzdar analaryna ózderin uryp-soǵyp, túnniń ortasyna deiin jumys isteýge májbúrleitinin habarlaǵan.
«Olar bazarda eki ápkege jumys istegen. Saýda aiaqtalǵannan keiin qyzdardy qoimada aýyr qaptar tasýǵa májbúrlegen, olarmen qul siiaqty qarym-qatynas jasaǵan. Qyzdar ketkimiz keledi degende, olardy uryp-soqqan. Men telefon soǵyp, qyzdarymdy bosatýdy talap ettim, biraq K.K. bas tartty, biz úsh jylǵa keliskenbiz dep aitty», — dedi áiel.
Ombýdsmen institýtyndaǵylardyń aitýynsha, jumys berýshilerdiń áreketi qyzdardyń quqyqtaryn buzǵan: balalar eńbegin paidalaný, májbúrli eńbekke tartý jáne belgilengen normadan artyq aýyr zattar kótertý — Qyrǵyz Respýblikasy Balalar kodeksimen tyiym salynǵan.
Qyrǵyz Respýblikasynyń Almatydaǵy Bas konsýldyǵy men qyrǵyz diasporasynyń kómegimen qyzdar Shymkentten tabyldy. Qazaqstannyń kóshi-qon zańnamasyn buzǵany úshin bolǵan sot isinen keiin qyrǵyzstandyq qyzdar eline qaitarylyp, analaryna tapsyryldy.
