Almatyda Kókjailaý aýmaǵynda júzege asyrylýy josparlanǵan Almaty SuperSki taý kýrorty jobasy boiynsha qoǵamdyq tyńdaý aiaqtaldy. Birneshe saǵatqa sozylǵan ashyq talqylaý barysynda jobanyń ekonomikalyq, týristik, áleýmettik jáne ekologiialyq aspektileri jan-jaqty qaraldy, dep habarlaidy dalanews.kz.
Qoǵamdyq tyńdaýǵa ekologtar, sarapshylar, kásipkerler, sport salasynyń mamandary, qoǵam belsendileri jáne qala turǵyndary qatysyp, jobaǵa qatysty pikirlerin bildirdi.
Tyńdaý qorytyndysy boiynsha qatysýshylardyń basym bóligi Almatynyń taý klasterin damytý bastamasyn qoldady. Joba avtorlary men qoldaýshylardyń pikirinshe, Almaty SuperSki Almatyny Ortalyq Aziiadaǵy jetekshi taý týrizmi ortalyqtarynyń birine ainaldyrýǵa múmkindik beredi.
Joba aiasynda halyqaralyq deńgeidegi zamanaýi taý infraqurylymyn qalyptastyrý kózdelip otyr. Jospar boiynsha jańa týristik aimaqta shańǵy trassalary, aspaly joldar, servis ortalyqtary, qonaqúiler, qoǵamdyq tamaqtaný oryndary jáne jyl boiy jumys isteitin týristik nysandar salynýy múmkin.
Sarapshylardyń aitýynsha, bul bastama Almatyǵa keletin ishki jáne sheteldik týrister sanyn edáýir arttyrýǵa yqpal etedi.
Qoǵamdyq tyńdaýda jobanyń ekonomikalyq tiimdiligine de erekshe nazar aýdaryldy. Spikerlerdiń aitýynsha, taý klasterin damytý myńdaǵan jańa jumys ornyn ashýǵa múmkindik beredi. Bul tek qurylys kezeńindegi ýaqytsha jumyspen qamtý emes, týrizm, qonaqúi biznesi, qoǵamdyq tamaqtaný, kólik, sport indýstriiasy men servis salalaryndaǵy turaqty jumys oryndaryn da qamtidy.
Keibir qatysýshylar tolyq iske qosylǵannan keiin joba shamamen 15 myń adamdy jumyspen qamtýǵa múmkindik beretinin aitty.
Tyńdaý barysynda jastar máselesi de kóterildi. Qatysýshylar halyqaralyq deńgeidegi týristik jobalardy júzege asyrý jastarǵa jańa kásibi múmkindikter ashyp, olardyń shetelge ketýin azaitýǵa yqpal etýi múmkin ekenin atap ótti. Sonymen qatar zamanaýi infraqurylym men halyqaralyq servis standarttarynyń engizilýi Almatyda jańa býyn mamandaryn daiarlaýǵa jol ashatyny aityldy.
Ekologiialyq qaýipsizdik máseleleri de keńinen talqylandy. Joba ókilderi qurylys jumystary halyqaralyq ekologiialyq talaptardy eskere otyryp júrgiziletinin málimdedi. Tabiǵi landshaftqa túsetin júktemeni azaitý úshin arnaiy sharalar qarastyrylǵany aityldy. Sondai-aq qoǵamdyq baqylaý men saraptamalyq monitoring jalǵasatyny atap ótildi.
Jekelegen belsendiler tarapynan qarsylyqtar men emotsiialyq pikirtalastar bolǵanymen, tyńdaý belgilengen tártip aiasynda ótti. Moderatorlar barlyq taraptyń pikir bildirýine múmkindik jasap otyrdy.
Qoǵamdyq tyńdaý sońynda joba odan ári júzege asyrýǵa qoldaý tapqany jariialandy. Endigi kezeńde tehnikalyq jáne jobalyq qujattamalardy ázirleý, memlekettik saraptamalardan ótý jáne infraqurylymdy kezeń-kezeńimen daiyndaý jumystary júrgiziledi.
Sarapshylardyń pikirinshe, Almaty SuperSki tek taý kýrorty ǵana emes, Almaty ekonomikasyna uzaqmerzimdi serpin beretin iri investitsiialyq joba retinde qarastyrylyp otyr. Joba júzege asqan jaǵdaida Almatynyń halyqaralyq týristik kartadaǵy róli kúsheiip, qala jyl boiy týrist qabyldaityn zamanaýi megapoliske ainalýy múmkin.
