Ál-Farabi atyndaǵy Qazaq ulttyq ýniversitetindegi Farabi Supercomputer ortalyǵy qoǵamdyq qaýipsizdikti arttyrýǵa jáne jol-kólik oqiǵalaryn azaitýǵa baǵyttalǵan intellektýaldy pilottyq jobany iske qosty, dep habarlaidy dalanews.kz.
Atalǵan bastamany QazUÝ bazasyndaǵy Injiniring jáne joǵary tehnologiialar klasteri, QR Bas prokýratýrasynyń Quqyqtyq statistika jáne arnaiy esepke alý komiteti birlesip iske asyrýda.
Joba eki negizgi baǵytty qamtidy. Birinshi baǵyt – qylmysty boljaý júiesi. Jasandy intellekt pen sýperkompiýterlik tehnologiialardyń kómegimen qylmys jii tirkeletin aýmaqtar anyqtalyp, quqyq qorǵaý organdaryna arnaiy taldaý men kórsetkishter usynylady. Bul quqyq qorǵaý qyzmetiniń tiimdiligin arttyryp, aldyn alý sharalaryn kúsheitýge múmkindik beredi.
Ekinshi baǵyt – jol-kólik oqiǵalaryn prediktivti taldaý. Júie qala aýmaǵyndaǵy jol apattary jii bolatyn aimaqtardy anyqtap, olardy arnaiy indikatorlar arqyly belgileidi. Sonyń nátijesinde qaýipti ýchaskelerge baqylaýdy kúsheitip, jol qaýipsizdigin arttyrýǵa jaǵdai jasalady.
«Atalǵan eki joba sýperkompiýterlik esepteýlerdi, jasandy intellektini, geoaqparattyq tehnologiialardy jáne úlken derekterdi taldaýdy qoldanýǵa negizdelgen. Obektivti analitikalyq bazany qalyptastyrý úshin QR Bas prokýratýrasynyń quqyqtyq statistikasy men arnaiy esepke alý derekteri paidalanylady. Quqyq qorǵaý organdary arnaiy platformadan qalanyń dinamikasyn baqylap, «qyzyl» aimaqtardaǵy tártiptik sharalardy kúsheitedi. Bul innovatsiialyq tásil memlekettik jáne qalalyq organdarǵa táýekelderdi aldyn ala basqarý júiesine kóshýge jol ashady», – deidi QazUÝ-daǵy Injiniring jáne joǵary tehnologiialar klasteriniń bas direktory Ómirjan Táýkebaev.
Bolashaqta ǵalymdar jobany Qazaqstannyń ózge qalalarynda da júzege asyrýdy josparlap otyr.
