Qazaqstannyń Tuńǵysh prezidenti Nursultan Nazarbaev "Habar" arnasyndaǵy "Shtrihi k portretý" derekti filminde jien nemeresi Aisultan Nazarbaevtyń ólimi týraly pikir bildirgen, dep habarlaidy dalanews.kz.
Derekti filmde Nazarbaev úsh qyzynan taraǵan nemereleri bar ekenin aityp, 2020 jyly bir nemeresinen aiyrylǵanyn eske alady. Ol Aisultannyń ózine qatty uqsaitynyn aityp, onyń ómirden erte ketkenine ókinetinin jetkizgen.
"Ókinishke qarai, biyl bir nemeremdi joǵaltyp aldyq. Ol maǵan óte uqsaityn edi. Óz ýaqytynan erte ómirden ótti", – degen Nazarbaev filmde.
Sondai-aq ol Aisultannyń densaýlyǵy men ómir saltyna qatysty qiyndyqtar bolǵanyn aityp, otbasy ony emdetýge tyrysqanyn jetkizgen. Nazarbaevtyń sózinshe, ony Máskeýde de, Londonda da emdetken, alaida jaǵdaidy tolyq baqylaýda ustaý múmkin bolmaǵan.
"Ony eshqaida jibermese de bolar edi. Biraq ony ustap otyrý múmkin bolmady. Ol bul istiń quly bolǵan, toqtai almady. Biz ony Máskeýde emdedik, Londonda da emdedik. Qaita shyǵyp, qaita oralatyn", – dedi Nursultan Nazarbaev.
Aisultan Nazarbaev 2020 jyly ómirden ótti. Onyń qazasy sol kezde qoǵamda úlken talqylaý týǵyzǵan edi. Ol Dariǵa Nazarbaeva men Rahat Álievtiń uly bolatyn.
"Shtrihi k portretý" derekti filmi Nursultan Nazarbaevtyń ómiri men qyzmetine arnalǵan kópseriialy joba retinde usynylǵan. Filmde onyń jeke ómiri, otbasy, saiasi joly jáne buryn kóp aityla bermegen estelikteri qamtylǵan.
