Búgin Qyzylorda oblysynyń ákimi Murat Ergeshbaevtyń qatysýymen «Maral Nur» jaýapkershiligi shekteýli seriktestiginiń jolaýshy vagondaryn jóndeý jáne tehnikalyq qyzmet kórsetýge arnalǵan jańa óndiristik kesheni iske qosyldy, dep habarlaidy dalanews.kz.
Saltanatty sharada aimaq basshysy elimizde mashina jasaý salasyn damytýǵa erekshe kóńil bólinip otyrǵanyn atap ótti. Memleket basshysynyń Joldaýynda aitylǵan mindetterge sáikes, turaqty ári boljamdy investitsiialyq orta qalyptastyrý baǵytynda júieli jumys júrgizilip jatyr.
Keiingi jyldary óńirde mashina jasaý salasy qarqyndy damyp keledi. Jyl basynan beri 7,9 mlrd teńgeniń ónimi óndirilip, ósim 4,7 paiyz bolǵan.
Óńirdiń geografiialyq jaǵynan tiimdi ornalasýy da kólik-logistikalyq áleýetti arttyrýǵa múmkindik berip otyr. Atap aitqanda, Qyzylorda oblysy halyqaralyq mańyzy bar «Batys Eýropa – Batys Qytai» kólik dáliziniń boiynda ornalasqan. Oblys aýmaǵynan 1 myń shaqyrymnan asatyn magistraldyq temirjol jelisi ótedi. Jyl basynan beri 400 myńnan astam jolaýshy jáne 6 mln tonnadan astam júk tasymaldanǵan.
Jańa keshen jylyna 600-den astam vagonǵa tehnikalyq qyzmet kórsetedi, 100 jańa jumys orny ashylady.
Oblys ákimi sheteldik seriktesterge, sonyń ishinde Qytai Halyq Respýblikasynan kelgen investorlarǵa kórsetilgen senim men yntymaqtastyq úshin alǵys bildirdi. Otandyq jáne sheteldik investorlarmen ashyq ári tiimdi áriptestikti odan ári damytýǵa daiyn ekenin atap ótti.
Jiynda jobany júzege asyrýǵa úles qosqan azamattar oblys ákiminiń Alǵys hatymen marapattaldy. Oblys prokýrory Rizabek Ojarov, «Maral Nur» JShS quryltaishysy Murat Nursaiytov sóz sóilep, el aǵasy Aitbai Kósherbaev aq batasyn berdi.
Aita keteiik, óńir ekonomikasyn ártaraptandyrý jáne jańa óndiris oryndaryn ashý maqsatynda aldaǵy úsh jylǵa 1,9 trln teńgeniń 48 investitsiialyq jobasy josparlanyp otyr. Bul jobalar aiasynda 10 myńnan astam jańa jumys orny ashylady. Biyl 100 mlrd teńgege 21 investitsiialyq jobany iske qosý kózdelse, aldaǵy ýaqytta quny 1 trln teńgeden asatyn 14 iri jobanyń qurylysy qolǵa alynady.
Jaqyn kúnderi ispandyq «Roca Group» kompaniiasynyń sanitarlyq-tehnikalyq buiymdar zaýyty men «Seven Rivers» kompaniiasynyń nemis tehnologiiasy negizinde shyny ydystar shyǵaratyn zaýytynyń qurylysy bastalady.
