Sarapshylar turǵyn úi naryǵyndaǵy baǵa jyl sońyna deiin ózgerýi múmkin ekenin aitady. Sondyqtan dál qazir, úi satyp alǵysy keletinderge áliptiń artyn baǵyp, kem degende eki ai qoia turǵan abzal. Biraq, kerisinshe alda baǵanyń kúrt ósý yqtimaldyǵyn da mamandar joqqa shyǵarmaidy, dep habarlaidy Dalanews.kz.
Ulttyq statistikalyq biýro málimetteri kórsetkendei, búginderi Qazaqstanda turǵyn úi baǵasy ósýde. Maýsym aiynyń qorytyndysy boiynsha Qazaqstanda bastapqy turǵyn úi baǵasy (jańadan salynyp jatqan) bir jylda 9,5%-ǵa qymbattady. Ekinshi naryqtaǵy (qoldanystaǵy baspanalar) ósim 6,7% -dy qurady, al jaldaý aqysy 9,4%-ǵa ósti. Alaida, ekonomist Eldar Shamsýtdinov alda suranys tómendep, kúzde baǵada ózgeris bolýy múmkin ekenin aitady
Ekonomistiń aitýynsha, búgingi tańda turǵyn úi baǵasynyń ósý qarqyny baiaýlaýda: maýsym aiynda jańa úiler baǵasy 1,1% -ǵa ǵana ósti, al Astanada qun 0,4% -ǵa tómendedi. Bir mezgilde jasalǵan mámileler sany da azaidy (Astanada: -6% jáne Almatyda: - 5%) jáne usynys kólemi de artqan: qańtar-mamyr ailarynda qoldanysqa berilgen jańa turǵyn úiler 5,7%-ǵa ósti, al jeke turǵyn úi qurylysynyń (JTQ) úlesi bar kólemniń úshten birinen asady. Iaǵni, satyp alýshylar páterlerge emes, jer úilerge kóbirek kóńil bóle bastaǵan (ósim 9,4%).
"Qazaqstandaǵy turǵyn úi naryǵy 2023-2025 jyldardyń basyndaǵy belsendi ósimnen keiin teńgerimdi kezeńge qarai bet burýda. Maýsym aiynda QR boiynsha jańa ǵimarattardyń baǵasy jyl basynan beri 6,9%, al sońǵy bir aida 1,1%-ǵa ósti, alaida elordada jaǵdai ózgerdi: bir aida - 0,4%, Almatyda ósim baiaýlady. Sonymen qatar ekinshi naryqta da qarqynnyń tejelý belgileri baiqalady: Astanada bir aidaǵy ósim - 0,6%, al Almatydaǵy qarqyn nól", – dep atap ótti ekonomist.
Onyń aitýynsha, bul faktiler dál qazir mámile jasaý úshin tamasha ýaqyt siiaqty kórsetýi múmkin. Alaida, iri megapolisterde páter satyp alý týraly sheshim qabyldaǵanda, keibir mynandai niýanstardy eskerý qajet.
"Bul arada sheshim qabyldaýda mańyzdysy belgili bir qalaǵa bailanysty. Eger dál qazir páter satyp alǵyńyz kelse, durysy Almatynyń birinshi naryǵyn tańdaǵan abzal. Óitkeni munda áli de usynystar shekteýdi jáne salystyrmaly túrde turaqty suranys bar. Biraq jańa turǵyn úi usynysyn artý yqtimaldylyǵyn eskergen jón. Sondyqtan, múmkin bolsa, kúzge deiin kútińiz. Astanadaǵy ekinshi turǵyn úi men jańa qurylystan páter tańdaýdy da keiinge qaldyra turǵan durys: ekinshi jartyjyldyqta baǵa tómendeýi múmkin", – dep esepteidi ekonomist.
Al ekonomist Rýslan Sultanov Qazaqstandaǵy jyljymaityn múlik naryǵy maýsym aiynda barlyq segmentter boiynsha ósimdi kórsetti, biraq dinamikasy birkelki emes ekenin aitady.
"Birinshi jyljymaityn múlik naryǵy memlekettik qoldaý jáne ipotekalyq baǵdarlamalar arqyly kósh bastap tur, al ekinshi turǵyn úi men baspana jaldaý naryqtarynda básekelestik qyzyp, suranystan usynystardyń artýy baiqalady. Bul tendentsiialar suranysqa, nesielerdiń qoljetimdiligine jáne jyljymaityn múlikke salynatyn investitsiialyq qyzyǵýshylyqqa bailanysty alda ózgeriske ushyraýy múmkin", - deidi ol.
Buǵan deiin saitymyzda Qazaqstanda úiler ótpei jatqanyn, biraq baǵanyń túspei turǵanyn jazǵanbyz.
