Qaraǵandy oblysynyń indýstriialyq damýyn jańa beleske shyǵaratyn óndiris orny ashyldy. Ol Saran qalasyndaǵy shina zaýyty. Osydan úsh jyl buryn bastalǵan joba otandyq ekonomikaǵa úles qosýǵa daiyn tur. Qazaqstanda jasalatyn avtokólik shinalarynyń sapasy men óndiriletin taýardyń naryqqa qalai shyǵatyndyǵyn óz kózimizben kórip qaittyq.
Osydan úsh jyl buryn Qaraǵandy oblysynyń Saran qalasynda qýattylyǵy jylyna 3,5 mln shina shyǵaratyn zaýyt salý bastalǵan bolatyn. Aýqymdy jobaǵa quiylǵan qarajattyń kólemi de az emes. Jalpy quny 228,9 mlrd teńge bolatyn shina zaýytynyń 140 mlrd teńgesi (58%) sheteldik investitsiia esebinen tartylǵan.
Óndiris kezeńniń barysynda shikizatty daiyndaý, qospalardy ázirleý, shinany jinaýdan bastap výlkanizatsiiaǵa deiingi sapany baqylaý, barlyq tehnologiialyq protsesterdi biryńǵai rettik júiede júzege asyratyn tolyq tsikldy qamtidy. Zaýytta 800-ge jýyq jabdyq ornatylǵan.
- Biz shinanyń sapasyna erekshe nazar aýdaramyz. Shinany jasaǵanǵa deiin biz barlyq syrtqy bólshekterin qaraimyz. Shinalar jol qozǵalasyna túsken siiaqty tolyq júktemede arnaiy stendke salynady. Júk kólikteri úshin bizde taǵy bir erekshe tekserý bar - bul rentgen. Árbir shina rentgen apparatynda tekseriledi. Avtokólikter avtobandarda óte jyldam júretinin eskersek, sapaǵa erekshe nazar aýdarylady. Maýsym aiynan keiin 15-16 diýimge deiingi jeńil shinalar shyǵarylady. Jalpy alǵanda, shinalar 14-ten 20 diýimge deiin bolady. Iaǵni, bul Qazaqstanda jeńil avtokólikterge arnalǵan alǵashqy shinalar. Al júk kóligine 17,5-ten 22,5 diýimge deiin shyǵarylatyn bolady, - deidi zaýyt direktory Radii Býrganov.
Zaýyt ónimderi "Attar" brendimen shyǵarylady. BUU qaýipsizdik Erejelerine sáikestigi týraly Eýropalyq sertifikat (tehnologiia men sapany maquldaý) jáne tehnikalyq reglamentke sáikestigi jóninde sertifikat alyp úlgergen. Atap aitqanda óndiristik alańdy sertifikattaý sátti júrgizilgen jáne ISO 9001: 2015 sapa menedjmenti júiesiniń sáikestik sertifikaty berilgen. Iaǵni, shinalar men ónimderdi óndirý tehnologiiasy sertifikattalǵan jáne halyqaralyq standarttardyń talaptaryna tolyq sáikes keledi.
Óndiristik jumys jospary boiynsha zaýyt biyl 1 million shina óndirýdi kózdep otyr. Zaýyt ónimin ishki naryqqa, otandyq avtokólik zaýyttaryna jáne eksportqa shyǵarýdy maqsat etken.
Kásiporyn jumyskerlerge qolaily jaǵdai jasap, olardyń áleýmettik jáne kásibi damytýyna den qoiǵan. Qazirgi ýaqytta zaýytta 530-dan astam qyzmetker jumys istep jatyr. Óndiris tolyq qýatqa qosylǵanda olardyń sanyn 1 125 adamǵa deiin arttyrý josparlanyp otyr. Eńbekkerlerdiń ortasha ailyq jalaqylary 366 myń teńgeden asady.
- Bul jai ǵana zaýyt emes, bul ulttyq progress pen ónerkásip kúshiniń simvoly. Bul Qazaqstannyń maqtanyshy. Basynan bastap aiaǵyna deiin shinalardy jańadan jasaityn alǵashqy zaýyt. Bul jai ǵana óndiris emes, bul el bolashaǵy men ekonomikasy úshin qurylǵan óndiris, - dedi indýstriialyq alpaýyt basshysy Radii Býrganov.
Kásiporyn basshylyǵy árbir qyzmetkerdi qoldaýǵa jáne damytýǵa, jaily ári nátijeli jumys isteýge jaǵdai jasaý mindetimiz deidi. Óitkeni qyzmetkerlerge qamqorlyq kórsetý, olardyń ál-aýqatyn arttyrý kompaniia bolashaǵynyń tabysty kilti ekenin túsinip otyr.
