«Sózime qulaq sal bala, kórgen-túigenim kóp, seniń de taqiiańa tar kelmes, meni tyńdasań saiasat degen saiqal qatynnyń aitqanyna kónip, jetegine júrýden saq bol!», – depti Grýziianyń eks-prezidenti.
Zelenskiidiń jeńiske jeterine shúbásiz sengen Saakashvili sailaýdyń ekinshi kezeńinde Ze! komandasyna qarata ári kúlli Ýkraina halqyna estirte úndeý joldaǵan-tuǵyn.
Demokratiiany shetqaqpailap otyrǵan talai eldiń shymbaiyna batypty osy úndeý. Amal joq, aýdardyq. Saakashvili bylai dep aǵynan jarylypty:
Qurmetti Vladimir Aleksandrovich!
Vladimir Zelenskii, sizge aitarym, saspańyz. Asyqpańyz, aptyqpańyz.
Poroshenkonyń dáýiri kelmeske ketip, dáýreni ótkenine óz basym senimdimin. Halyqtyń sizge degen yqylasy erekshe, siz Ýkrainanyń kelesi prezidenti bolasyz.
Poroshenkonyń atarǵa oǵy joq, jyldar boiy jinaǵan dáýleti de, qasyndaǵy qolshoqparlary da kómektespeidi oǵan endigi jerde.
Bálkim, bilikten aiyrylǵysy kelmeitin ol radikaldy áreketke barýy múmkin. Alaida munyń aqyry Poroshenko ǵana emes, tutas memlekettiń shańyraǵyn shaiqaltyp tynady.
Ýkrainaǵa beijai qarai almaimyn, onyń taǵdyryna qatty alańdaimyn. Ýkraina – meniń ekinshi Otanym. Sol sebepti sizge asa ózekti, erekshe ómirsheń aqyl-keńesimdi aitqym keledi, Vladimir Aleksandrovich.
Erteńgi kúni sailana sala osy aitqanymdy aldyńǵy kezekte eskerersiz dep senemin.
Men...
...jáne men úmit artqan ujymnyń Grýziiadaǵy jemqorlyqty qalai jeńgenin jaqsy bilesiz.
Muny tek bir ǵana jaǵdaida júzege asyrýǵa bolady.
Sailaýda jeńiske jetkennen keiin eldegi barlyq quqyq qorǵaý organdaryn ornynan aldyq.
Prokýratýra, Ishki ister ministrligi, shaý tartqan mentter, paraqorlar politseiler taily-tuiaǵy qalmai qyzmetten ketti. Grýziianyń Qaýipsizdik ministrligin (SBÝ) aldyq ta qysqartyp tastadyq.
Sý jańa Ishki ister ministrligin qurdyq. Dál osy ministrlik Grýziiany jyldar boiy bilep-tóstep, bilgenin istegen kriminaldy-korrýptsiialyq júieniń kúlin kókke ushyrdy.
Ainalasy eki-úsh jylda eldi túrme «avtoritetterinen» túgeldei tazarttyq. Bostandyqta júrgen bopsalaýshylar, qapteserler men baýkespelerdiń bári abaqtyǵa qamaldy.
Tek sodan keiin baryp jańa ári damyǵan Grýziianyń iretasyn qalaýǵa kóshtik.
Ekonomikaǵa qan júgirip, el etek-jeńin jinai bastady, memlekettiń ál-aýqaty artty. Birte-birte Eýropaǵa qarailap, Batystyń bir bólshegine ainalý úshin qajetti reformalar júrgizdik.
Bilesiz be?
Mundai ońtaily sát Ýkrainada da bolǵan. 2004 jyly ýkrain halqy bilikke Viktor Iýshenkony alyp keldi.
Maidanǵa shyqqan eldiń arqasynda Iýshenko Ianýkovich jetekshilik etken kriminaldar men korrýptsionerlerdi jeńip shyqty.
Iýshenkonyń eń úlken qateligi – Ianýkovichti saiasatta qaldyrǵany. Sol tustaǵy bylyǵy betine shyqqan Ianýkovichtiń klanyna qarsy birde-bir qylmystyq is qozǵalǵan joq.
Iýshenkonyń «Ury-qarylar túrmeden tabylady» degen sailaýaldy urany sóz júzinde qaldy. Oligarh ataýlylar saiasattan alastatylmady. Saiasat pen oligarhtar bite qainasyp jatty.
Bul sol sailaýda tas-talqan jeńilgen Ianýkovichke qaita qanat bitirdi, saiasatqa qaita oralýǵa jaǵdai jasady.
Aldymen jaqtastaryn jinap Parlamentti «basyp» aldy, artynan Úkimetbasy kreslosyna qonjidy. Sońynan prezident boldy.
Qazirgi Ýkraina biligindegi shendi-shekpendilerdiń kópshiligi, munyń ishinde Poroshenko da bar, sol júieniń sarqynshaǵy.
Syn saǵat
Sailaýdan keiin Sizdi myń-san másele kútip tur. Soǵys. Jemqorlyq. Kedeishilik.
Eń negizgisi, eski júie sizdiń degenińizge kónbei, qasyq qany qalǵansha qarsylasady. Eski júie sizdiń aiaǵyńyzdan shalyp, jon arqańyzdan qanjar suǵýǵa tyrysady. Aýyr bolady. Óte aýyr bolady sizge.
Eski júieniń ishinde Poroshenko men onyń nókerleri sizdiń eń basty opponentińiz atanbaq.
Prezidenttikten aiyrylǵan kúnde onyń RADA-daǵy fraktsiiasy men oǵan baǵynyshty depýtattardyń sany basym.
Prezident bolǵaly órmekshidei órgen korrýptsiialyq shemasy sógilmeidi. Ólermen oligarhtar da bilikti qoldan berýge asyqpaidy.
Sondyqtan da Poroshenko bastaǵan jemqor júiege qarsy ymyrasyz kúres júrgizý siz úshin – negizgi mindet. Joq, siz meni durys túsinińiz.
Eger Poroshenko men onyń ainalasy bilikte qalsa, siz alǵa jyljymaisyz, jipsiz bailanasyz otyrǵan ornyńyzda.
Al alǵa jyljymasańyz, ekonomikany kótere almaisyz, tiisinshe agressorǵa (Resei) qarsy tura almaisyz.
Korrýptsiianyń kózin joimai is ónbeidi. Korrýptsiianyń kózin joiýdy joǵarydan bastaý kerek.
Týǵandy bide iman joq.
Korrýptsiiamen kúreste kóleńkesinen qorqatyn Bas prokýror taǵaiyndar bolsańyz halyq sizdi «ekinshi Iýshenkoǵa» ainaldyrady.
Týra bide týǵan joq.
Sizge Poroshenko men onyń bandysynyń bopsalaýynan qoryqpaityn, memleketti TOP korrýptsionerlerden tazartýdy murat tutqan, olardyń atyna da, ataǵyna da pysqyrmaityn prokýror taǵaiyndaý qajet.
Bulai bolmasa qoǵamnyń sizden kóńili qalady. Oryntaǵyńyzda alty ai otyrasyz ba, joq pa...
Al eger...
Al eger eldegi jemqorlardyń bas-basyna qylmystyq is qozǵalyp, aýqymdy is aiaǵyna deiin jetse;
jemqorlar, sonyń ishinde Poroshenko men onyń nókerleri zań aldynda jaýap berip, laiyqty jazasyn alsa;
Halyq Poroshenko bastaǵan qańsyǵan, qunyqqan, dánikken, jemqorlanǵan eski júiemen birjolata qosh aityssa, mine, sonda ǵana sizge alǵa júrip, shynaiy reforma júrgizýge múmkindik týady.
Adamdar ádildikke zárý. Adam ádiletke emes, ádilet adamǵa jumys isteitin zaman ornaǵanyn qalaidy. Sizden sony kútedi halyq.
Eski júieniń eshbir ókili sizdi qoldaǵan joq. Sizdi eski saiasi júieniń túbine jetetin qaýip dep sanaidy olar.
Oiǵa alǵan isińiz oryndalmai, qolyńyzdan qairan kelmese sanyn shapalaqtap qýanady.
Sizde halyqtyń qoldaýy bar. Kez kelgen qýlyq-sumdyqty halyq qoldaýynyń arqasynda eńserýge tiissiz.
Esińizde bolsyn, Poroshenko men onyń «otbasy» saiasatta qalmaýy qajet. Aldyńyzdaǵy adamdardyń qateligin qaitalap júrmegeisiz.
Qurmetpen, M.S.
Al, aýdarǵan Dýman BYQAI
