Reseı 2025 jyly Baıqońyrdan áskerı zymyrandar ushyrmaıdy. Bul týraly Qazaqstannyń Sıfrlyq damý, ınovasıalar jáne aeroǵarysh ónerkásibi mınıstrligi "Ashyq NQA" portalynda jarıalaǵan qujatta aıtylǵan, dep habarlaıdy Dalanews.kz.
Mınıstrliktiń málimetinshe, 2025 jyly Baıqońyrdan ǵarysh apparattaryn ushyrý tek "Reseıdiń ǵarysh qyzmeti" memlekettik baǵdarlamasy aıasynda, sondaı-aq halyqaralyq yntymaqtastyq pen komersıalyq jobalar sheńberinde júzege asyrylady.
"2025 jyly ǵarysh apparattaryn ushyrý Reseı Federasıasynyń "Reseıdiń ǵarysh qyzmeti" memlekettik baǵdarlamasy, Baıqońyr ǵarysh aılaǵynan Halyqaralyq yntymaqtastyq jáne komersıalyq jobalar baǵdarlamalary sheńberinde júzege asyrylatyn bolady. Qazaqstan SİM Reseı tarapynyń 2025 jylǵa arnalǵan áskerı maqsattaǵy ǵarysh apparattaryn ushyrý jáne ǵarysh aılaǵynan zymyrandardy synaqtan ótkizý josparlary joq ekenin habarlady", - delingen túsindirme jazbada.
Mınıstrliktiń baspasóz qyzmeti kelesi jyly Baıqońyrdan toǵyz azamattyq ushyrý josparlanyp otyrǵanyn aıtty.
Aıta keteıik, Roskosmos kelesi jyldan bastap Baıqońyr ǵarysh aılaǵyn konservasıalaý týraly jabyq konsýltasıalar ótkize bastaǵanyn DALA INSIDE derekkózi habarlaǵan edi.
Roskosmos mekemeleri, ásirese mańyzdy bolyp sanalatyn jer serikterin jasaıtyn «Hrýnıchev ortalyǵy» men zymyran qurastyratyn RKS «Progres» sanksıaǵa ushyraǵaly beri, Reseıdiń ǵarysh vedomstvosy aýyr qarjylyq jaǵdaıǵa dýshar boldy. Barlyq halyqaralyq tapsyrystar toqtaǵandyqtan, al Reseı áskerıleri spýtnıkterin Plesesk ǵarysh aılaǵynan ushyryp júrgendikten, Baıqońyrdan Roskosmosqa shyǵynnan basqa eshteńe túspeı otyr.
Reseı onsyz da Baıqońyrda barynsha qysqaryp, 234 nysandy Qazaqstanǵa qaıtaryp bergen bolatyn. Ózine tek ǵaryshqa zymyran ushyratyn ınfraqurylymdy saqtap qalǵan. Biraq onyń ózin ustap turýǵa qajet shyǵyndardy jaba almaıtyny baıqalady. Reseı Federasıasy 2050 jylǵa deıin sozylǵan kelisim boıynsha Baıqońyrdy jalǵa alǵany úshin Qazaqstanǵa jylyna 115 mıllıon dollardan tólep otyrýy tıis. Bıyl Reseıdegi búdjet defısıti 2 trıllıon rúblden asatyny boljanyp otyr. Ol ishki jalpy ónimniń 1,1 paıyzy bolady.
Roskosmostyń jaǵdaıy óte múshkil. Oǵan ne memleket kómektesýi kerek, nemese naryqtan qaryz alýy tıis. Bıyldan bastap Roskosmos oblıgasıa shyǵarý quqyǵyna ıe boldy. Ol Reseı Qarjy mınıstrliginiń «mekeme naryqtan ózi qaryz alsyn, bizdiń oǵan tikeleı sýbsıdıa beretin jaǵdaıymyz joq» ısharasyn bildiredi.
«Búdjetti qysqartqanda, Roskosmostyń eń birinshi oılanatyny Baıqońyr», - deıdi derekkóz. «Al Roskosmos qazirgi soǵys jaǵdaıynda áskerı baǵdarlamalardan basqa barlyq búdjetti qysqartýǵa májbúr. Sondyqtan kelesi jyldy Baıqońyrdaǵy zymyran aılaqtarynyń tehnıkalyq qamtylýy ekitalaı. Reseı Baıqońyrdy tek strategıalyq jaǵynan ǵana saqtap qalýǵa tyryspasa, bylaıynsha, qazir esh praktıkalyq qajeti joq».
Reseı ketip qalǵan jaǵdaıda, Qazaqstan óz betinshe Baıqońyrdy tek mýzeıge aınaldyra alady. Sebebi qazir biz jyl saıyn ǵaryshqa bólip otyrǵan 1 mıllıard teńge eshteńege jetpeıdi. «Vostochnyı» áýejaıyn saqtap qalyp, damytyp, Baıqońyrdy sheteldik týrıser keletin kúltti orynǵa aınaldyrý ıdeıasy jaman emes. Nemese Baıqońyrdy kádimgi ǵarysh starty retinde saqtap, damytý úshin Qytaı, álde Ilon Maskqa júginý ǵana qalyp otyr.
DALA INSIDE Roskosmostyń 2024 jylǵy qarjylyq ahýalyn monıtorıńte ustap otyrady.
