Almatyda sýrrogat ana tapsyrys berýshiler ýáde etken aqysyn ala almai otyrǵanyn aityp, olardan 7,5 mln teńge talap etýde. Onyń aitýynsha, biologiialyq ata-analar shala týǵan sábiden bas tartyp, bailanysqa shyqpai ketken, dep habarlaidy Dalanews.kz KTK telearnasyna silteme jasap.
27 jastaǵy Kristina Gavriliýk aqsha úshin basqa otbasynyń balasyn kóterýge kelisim bergen. Onyń aitýynsha, Qytai azamattary bolyp tabylatyn erli-zaiypty juppen kelisimshart jasalǵan. Embriondy Almatydaǵy klinikalardyń birinde salǵan.
Júktilik kezinde tapsyrys berýshiler oǵan turaqty túrde aqsha aýdaryp otyrǵan. Ai saiyn shamamen 200 myń teńge tólep turǵan.
Alaida júktilik asqynýyna bailanysty Kristina jetinshi aida bosanyp, shala týǵan ul dúniege kelgen. Áieldiń sózinshe, osydan keiin biologiialyq ata-analar balany alýdan bas tartqan.
Kristinanyń aitýynsha, kesar tiliginen keiin náresteni birden bólimshege alyp ketken.
«Birneshe saǵattan keiin medbike kelip, balanyń jaǵdaiy jaqsy ekenin aitty. Keiin biologiialyq ata-analar aldymen balanyń densaýlyǵyn tekserý úshin analiz tapsyrýdy talap etti. Taldaý nátijeleri jaqsy shyqty. Keiin olar DNQ saraptamasyn jasatýdy surady. Saraptama balanyń solardyń perzenti ekenin rastady. Sodan keiin biraz ýaqyt kýrator arqyly sóilesip turdym. Keiin biologiialyq ana jaýap bermei, balany alyp ketýdi surady», – deidi ol.
Kristina dúkende satýshy bolyp jumys isteidi jáne alty jastaǵy qyz tárbielep otyr. Buǵan deiin ol eki ret sýrrogat ana bolǵan jáne ol jaǵdailardyń bári sátti aiaqtalǵan.
Al bul joly áiel ýáde etilgen syiaqysyn ala almai qalǵanyn aitady. Ol shyn máninde basqa adamnyń balasyn tárbieleýge daiyn emes ekenin ashyq málimdedi.
«Men tek aiaimyn. Óitkeni osylai bolyp qaldy. Dárigerler keiin ol tastandy bala bolýy múmkin ekenin aitty. Keiinnen onyń ata-anasy bas tartqany týraly jazyldy. Sol sátte men ózimdi ǵana oiladym – olar meni aldap ketti. Bala maǵan kerek emes. Óitkeni ol meniń balam emes», – deidi Kristina.
Bosanǵannan keiin áiel jańa týǵan sábiden resmi túrde bas tartqan. Qazir náreste sábiler úiinde.
Biologiialyq ata-analar týraly naqty aqparat az. Olardyń Qytai azamattary ekeni ǵana belgili. Qazir qaida júrgeni belgisiz. Embrion salý protsedýrasy jasalǵan klinika bul jaǵdaiǵa qatysty pikir berýden bas tartqan.
Kristina politsiiaǵa aryz jazǵanymen, Almaty qalalyq politsiia departamenti qylmystyq is qozǵaýdan bas tartqan.
Politsiia ókilderiniń aitýynsha, tekseris nátijesinde qylmystyq nemese ákimshilik quqyqbuzýshylyq belgileri anyqtalmaǵan. Sondyqtan bul máseleni azamattyq sot tártibimen sheshý usynylǵan.
Qazaqstanda sýrrogat ana bolý zańmen ruqsat etilgen. Bul qatynastar «Neke (erli-zaiyptylyq) jáne otbasy týraly» zańmen retteledi. Qujat sýrrogat ananyń meditsinalyq kómekti alýyna jáne kelisilgen syiaqyny alýyna kepildik beredi.
Zańgerlerdiń aitýynsha, áiel sotqa júginip, ýáde etilgen aqyny talap ete alady. Sonymen qatar biologiialyq ata-analar shetel azamattary bolǵandyqtan, Qytai elshiligine jáne Syrtqy ister ministrligine de júginýge bolady.
Keibir zańgerler ata-analardyń áreketi balany qaraýsyz qaldyrý retinde qarastyrylýy múmkin ekenin aitady.
Qazir jańa týǵan sábi sábiler úiinde dárigerlerdiń baqylaýynda. Mamandar onyń jaǵdaiyn turaqty dep baǵalap otyr – bala birtindep salmaq qosyp keledi.
Ázirge náreste ata-anasy bas tartqan bala mártebesine ie. Onyń ári qaraiǵy taǵdyryn memleket sheshedi.
