Bir kezderi Qyrǵyzstan Qazaqstanǵa bergen pansionattar qaitadan qyzý talqyǵa tústi. Bishkek Astanamen 18 jyl buryn jasalǵan kelisimge ózgerister engizbek, - dep habarlaidy Dalanews.kz "Nastoiashee Vremia. Aziiaǵa" silteme jasap.
2006 jyly Qyrǵyzstan Qazaqstanǵa 4 pansionat nysanyn bergen bolatyn. Bul jerler Qazaqstanǵa 49 jylǵa jalǵa berilgen edi. Kelisimniń eń basty sharty - qazaqstandyqtar ol jerlerde zamanaýi qonaqúiler salýy kerek bolǵan. Arada 18 jyl ótken, alaida qonaqúiler áli salynbaǵan, al tórt pansionattyń úsheýi tozyp ketken.
"Qazaqstan ol jerde 3, 4 juldyzdy qonaqúiler salýy kerek bolǵan. Biraq kelisimde talaptar belgilenbegen jáne olar oryndalmasa qandai jaýapkershilik kózdelgeni jazylmaǵan. Qazirgi tańda kelisimde 5 jyl merzim belgilendi. Eger pansionattar osy ýaqyt aralyǵynda qonaqúige ainalmasa, Qyrǵyzstan 60 kúnniń ishinde Qazaqstan pansionattarǵa salǵan aqshany qaitarmai-aq kelisimdi buza alady", - deidi Qyrǵyzstannyń Ekonomika jáne kommertsiia ministriniń orynbasary Iskender Asylkýlov.
Qyrǵyzstannyń ministrler kabinetiniń bul usynysyn Parlamenttiń beiindik komiteti qoldaǵan. Bul usynysty eldiń barlyq zań palatasy da qoldaýy múmkin.
Al Qazaqstan úkimeti mundai túzetýlerge qalai qaraityny ázirge belgisiz.
Kelisimdegi ózgeris iske asa bastaýy úshin ony eki eldiń de parlamentteri ratifikatsiialaýy kerek.
Aita keteiik, Qyrǵyzstan Ystyq kólde Ózbekstanǵa da pansionattaryn bergen bolatyn. Bishkek pen Tashkent pansionattar kimge tiesili ekenin uzaq talqylap, byltyr kelisimge kelgen. Qyrǵyzstan pansionattardy Ózbekstanǵa da 49 jylǵa jalǵa beretin boldy. Ózbekstanǵa da zamanaýi qonaqúiler salý kerek degen shart qoiylǵan.
