Forýmdy Ál-Farabi atyndaǵy QazUÝ-dyń Basqarma Tóraǵasy –Rektory Janseiit Túimebaev ashyp, Respýblika kúnine arnalǵan sharanyń máni men mańyzyn atap ótti. «Sizder elimizdiń bolashaǵy, jańa Qazaqstandy qurýshy jańa býyn ókilderisizder. Memleket basshysy Qasym-Jomart Toqaev: «Qazaqstan – daryndy jastar mekeni. Búgingi jastar ǵylym men tehnologiianyń qyr-syryn igergen óte bilimdi, alǵyr. Biz olardyń órisin ashyp, qarym-qabiletin shyńdaý úshin bar múmkindikti jasaýǵa tiispiz», – dep airyqsha atap ótken bolatyn», – dedi rektor.
Búginde jas ǵalymdardyń, talantty stýdentterdiń shyǵarmashylyq, ǵylymi áleýetin damytýda ýniversitet barlyq qajetti jaǵdaidy jasaýda.
QazUÝ-da 40 jasqa deiingi 300-den astam jas ǵalym jumys isteidi. Olardyń ishinde 49-y – Ǵylym jáne joǵary bilim ministrliginiń «Jas ǵalym» jobasynyń jeńimpazy. Kópshiligi álemniń jetekshi ýniversitetteri men ortalyqtarynda ǵylymi taǵylymdamadan ótti. Jas zertteýshilerdiń ǵylymi jetistikteri Qazaqstanda jáne shetelderde joǵary baǵaǵa ie. Biylǵy 2022 jyly jas ǵalymdardy granttyq qarjylandyrý aiasynda 900 mln teńgeden astam 60-qa jýyq joba oryndalýda. Bilim ordasynyń basshysy bul QazUÝ jastarynyń joǵary ǵylymi-innovatsiialyq áleýetin kórsetetinin jetkizdi.
Geografiia jáne tabiǵatty paidalaný fakýltetiniń oqytýshysy, PhD kandidaty, kommertsiialandyrý boiynsha jobalardy oryndaýshy Eldar Nuruly óz baiandamasynda «Týrizmniń tsifrlyq kontentin jańǵyrtý: mobildi qosymshalar, panoramalyq 3D týrlar, interaktivti kartalar jáne QR kodtary» atty jobasynyń nátijelerin kommertsiialandyrý tájiribesimen bólisti.
«Bul jobanyń missiiasy – ishki týrizmdi damytý arqyly el ekonomikasyn ártaraptandyrý jáne Qazaqstannyń týristik baǵyttary týraly aqparatty shoǵyrlandyrý. Biz bul máselelerdi tsifrlyq tehnologiialardy, atap aitqanda: mobildi qosymshalardy, panoramalyq 3D virtýaldy týrlardy, QR-kodtardy, interaktivti kartalardy generatsiialaýdy paidalana otyryp júzege asyramyz», – dedi ol.
QazUÝ-dyń «Qoǵammen bailanys» bilim berý baǵdarlamasynyń 4-kýrs stýdenti Arýjan Qabdolova óz sózinde adamnyń ómirin uzartýǵa, densaýlyǵyn baqylaýǵa jáne jaqsartýǵa, qajettilikterin qamtamasyz etýge múmkindik beretin ǵylymnyń rólin joǵary baǵalady. Eń bastysy – ǵylym ómirge jańa serpin beretinin aitty. Ǵylymi jetistikter QazUÝ-dyń tynys-tirshiligin qalai ózgertkenine nazar aýdara otyryp, Arýjan: «Men bizdiń jastarymyz, árbir jas mamannyń qazirgi jáne jarqyn bolashaǵymyzdan shabyt alyp, ǵylymǵa shyǵarmashylyq qyzyǵýshylyq tanytqanyn jáne óz salasynda jumys istegenin qalaimyn», – dedi.
Sonymen qatar jiynda himiia jáne himiialyq tehnologiia fakýltetiniń PhD doktoranty Fedor Malchik, «Halyqaralyq qatynastar (RÝDN)» bilim berý baǵdarlamasynyń 2-kýrs magistranty Aidana Toqbergen pikir bildirip, óz usynystarymen bólisti.
Forým aiasynda zertteýlerdi kommertsiialandyrý máseleleri jáne ýniversitettiń jas zertteýshi ǵalymdarynyń ǵylymi qyzmetiniń ózekti baǵyttary talqylandy.
Jiyn sońynda rektor jas ǵalymdarmen erkin formatta kezdesip, ǵylymdaǵy ózekti máselelerdi talqylaý úshin Jas ǵalymdar klýbyn qurýdy jáne ǵylymi jetistikter kórmesin uiymdastyryp, ǵylymi ázirlemelerdi óndiriske engizýge jol ashatyn Jas ǵalymdar qoryn qurýdy tapsyrdy.
