Qazaqstan Respýblıkasynyń Básekelestikti qorǵaý jáne damytý agenttigi Qazaqstan Respýblıkasynyń Sıfrlyq damý, ınovasıalar jáne aeroǵarysh ónerkásibi mınıstrligimen birlesip, salanyń quzyretti mamandaryn tarta otyryp, Iandeks Taksı kompanıasynyń algorıtmdik baǵa qalyptastyrý tıimdiligine aýdıt júrgizdi. Aýdıtten ótý mindeti Iandeks Taksıge monopolıaǵa qarsy komplaens aıasynda júktelgen bolatyn, dep habarlaıdy Dalanews.kz.
Aýdıttiń maqsaty — Iandeks Servısin, onyń ishinde taksı qyzmetteriniń baǵasyna áser etetin sharttar men parametrlerdi zerdeleý boldy.
Atap aıtqanda, júıeniń arhıtektýrasy, baǵa qalyptastyrýdyń bazalyq jáne dınamıkalyq komponentteri zertteldi, sonymen birge áýejaı aımaqtary men qalanyń ortalyǵynan alys aýdandardaǵy erekshelikter, sondaı-aq operasıalyq prosester qarastyryldy.
Aýdıttiń bastapqy qorytyndylary boıynsha baǵa belgileý júıesinde birqatar táýekelder anyqtaldy. Keıbir táýekelder joıyldy, al qalǵandary boıynsha Iandeks olardy joıý jóninde mindettemeler qabyldady.
Osylaısha, Agenttiktiń habarlamasy negizinde paıdalanýshylarǵa arnalǵan adaldyq baǵdarlamasynyń erejeleri (Iandeks+ baǵdarlamasy) ózgertildi, nátıjesinde Iandeks osy baǵdarlama boıynsha barlyq shyǵyndardy (klıentterge usynylatyn jeńildikterdi) tolyq óz moınyna aldy.
Iandeks qoldanystaǵy komplaens júıesine mynadaı ózgerister engizdi:
- taksı tarıfteriniń jáne jol júrýdiń bazalyq qunynyń qymbattaıtyny týraly Agenttikke 3 kún buryn habarlaý;
- áýejaı mańyndaǵy keıbir turǵyn aımaqtardy áýejaı tarıftik aımaǵynan alyp tastaý (1 apta ishinde);
- jol júrýdiń bazalyq qunynan eki ese asatyn somadan komısıa ustamaý (bul júrgizýshilerdiń tabysyn arttyrýǵa yqpal etedi);
- «Ekonom» tarıfindegi komısıany ár qalada eki jylda bir retten jıi kótermeý (atalǵan tarıf eń suranysqa ıe tarıf bolyp tabylady);
- maksımaldy suranys jaǵdaıynda tarıfti úsh eseden artyq kóterýdi shekteý (mysaly, aýa raıy qolaısyz kúnderi nemese mereke kúnderi, mundaı saparlar ár toqsanda ár qalada barlyq saparlardyń 5%-ynan aspaýy kerek, bul talap naqty kórsetilgen);
- suranysy tómen aımaqtar úshin tarıf quramyndaǵy qosymsha tólem komponentin paıdalanýshy qosymshasynda túsinikti kórsetý;
- 2025 jyldyń 30 maýsymynan keshiktirmeı paıdalanýshylarǵa sapar baǵasynyń tolyq qurylymyn qosymshada kórsetý;
- tehnıkalyq qoldaý sapasyn arttyrý, atap aıtqanda, paıdalanýshylardyń ótinishterin óńdeý algorıtmin ońtaılandyrý.
Budan bólek, Iandeks Taksı paıdalanýshylardy taksı qyzmetterine suranys deńgeıi týraly habardar etý sharalaryn jaqsartpaq. Atap aıtqanda, «Ekonom» tarıfinde suranys óte joǵary bolǵan kezde (mysaly, aýa raıynyń qolaısyzdyǵy kezinde) synaq rejıminde vırtýaldy kezek júıesi engiziledi. Bul júıe arqyly paıdalanýshy qansha adamnyń taksı kútip turǵanyn kóre alady jáne tańdaý jasaı alady: kezekke turý, basqa tarıfti tańdaý nemese qoǵamdyq kólikpen júrý.
Iandeks Taksı antımonopolıalyq komplaens aıasyndaǵy mindettemeleriniń oryndalýy Agenttik janyndaǵy arnaıy monıtorıńtik toptyń baqylaýynda. Onyń quramyna kásibı qaýymdastyqtardyń sarapshylary (bastamashyl toptardyń, Kólik, Eńbek jáne halyqty áleýmettik qorǵaý, Ádilet, Sıfrlyq damý jáne ınovasıalar mınıstrlikteriniń, sondaı-aq taksoparkter qaýymdastyǵynyń ókilderi) kiredi.
Úkimetke jeke kásipkerler úshin arnaıy salyq rejımi boıynsha salyqtyq eseptilikti jeńildetýge qatysty zańnamalyq túzetýlerdi jedel engizý jóninde usynystar joldandy. Bul ózgerister taksı júrgizýshileriniń tabysyn arttyrýǵa yqpal etedi.
