Qazaqstannyń "Máńgilik polk" aktsiiasyn ótkizýden bas tartýy Reseide "ashyqtan-ashyq dostyqsyz qadam" dep baǵalandy, dep habarlaidy Dalanews.kz.
Reseilik "Gosnovosti" portalynyń avtorlary Qazaqstanda "Máńgilik polk" sherýiniń ótpeýine birneshe sebep ataidy. Olardyń pikirinshe, bul sheshim arqyly Qazaqstan Ýkrainaǵa óziniń beitaraptyǵyn kórsetkisi keledi. Sonymen birge, Astana óziniń derbestigin bildirip, eldiń "kishi baýyr" róline kóngisi kelmeitinin ańǵartyp otyr.
Alaida basylym sholýshysy basty sebep retinde Qazaqstan men Qytai arasyndaǵy bailanysty ataidy.
"Sońǵy jyldary Qazaqstan "Bir beldeý — bir jol" megabaǵdarlamasy aiasynda infraqurylymdyq jobalardy damytý úshin Pekinnen qomaqty nesieler aldy. Bul nesieler jai ǵana qarjylyq kómek emes edi: olar strategiialyq salalarǵa qytailyq kompaniialardyń qoljetimdiligin ashý, birlesken ónerkásiptik aimaqtar qurý, qazaq dalasy arqyly Eýropaǵa baratyn kólik dálizderin damytý mindetterimen birge keldi.
Nátijesinde Qazaqstan Qytaidyń infraqurylymdyq jelisine qosylyp, Resei emes, Qytaidyń úlken eýraziialyq "qaýipsizdik beldeýiniń" bir bóligine ainaldy. Qazaqstannyń Qytai jobalaryna integratsiiasy tereńdegen saiyn Reseige saiasi qadam jasaýǵa múmkindik azaia túsýde, tipti ol ortaq tarihi jady sekildi simvolikalyq deńgeide bolsa da", — dep jazady basylym.
Eske salsaq, Qazaqstanda "Máńgilik polk" sherýiniń ornyna "Batyrlarǵa taǵzym" atty onlain-aktsiia uiymdastyrý týraly sheshim qabyldanǵan. Arnaiy ázirlengen portalǵa ardagerler týraly keń ári únemi jańartylyp otyratyn derekter bazasy ornalastyrylǵan. Búginde munda 677 000-nan astam ardagerdiń derekteri bar, olardyń ishinde 365 Keńes Odaǵynyń Batyry, eki márte batyr ataǵyn alǵan tórt adam jáne Dańq ordeniniń 19 iegeri tirkelgen.
"Portal interfeisi qajetti aqparatty tabýǵa ǵana emes, sonymen birge saitqa óz týystary-ardagerler týraly málimet qosýdy jáne sońǵy jańalyqtarmen tanysýdy da múmkin etedi", — dep habarlady Mádeniet ministrligi.
Buǵan deiin "Máńgilik polk" sherýin ótkizýge tyiym salynǵanyna qaramastan sharaǵa qatysý týraly usynystar túskenin jazǵan edik.
Telegram arnalarda "Máńgilik polk" sherýin ótkizý týraly usynystar túse bastaǵan. Sharaǵa qatysqan adamdarǵa aqshalai syilyq qarastyrylǵan.
Aita keteiik, 2025 jyly Qazaqstanda Ekinshi dúniejúzilik soǵys ardagerlerin ulyqtaýǵa arnalǵan dástúrli "Máńgilik polk" sherýin ótkizýge resmi túrde tyiym salyndy. Bilik ókilderi mundai sheshimdi qaýipsizdik sharalarymen, qoǵamdyq tártipti saqtaý qajettiligimen jáne halyqaralyq jaǵdaidyń turaqsyzdyǵymen túsindirdi.
Sherýdiń ornyna biyl eske alý sharalaryn onlain formatta ótkizý usynyldy. Uiymdastyrýshylar azamattardy týystarynyń sýretterin áleýmettik jelilerde jariialap, estelik sharalaryna virtýaldy túrde qatysýǵa shaqyryp otyr.
Sherýge tyiym salý qoǵamda ekiushty pikir týdyrdy. Bir tarap bul sheshimdi tarihi jadyny shekteý dep baǵalasa, ekinshisi qaýipsizdikti birinshi orynǵa qoiǵan durys deidi. Áleýmettik jeliler men forýmdarda balama joldar men eske alý rásimderiniń basqa nusqalary qyzý talqylanýda.
Aita keteiik, Ortalyq Aziia elderi arasynda 2025 jyly mundai sherý ótkizýge tek Qazaqstanda ǵana tyiym salynǵan. Ózge elderde eske alý sharalary túrli formatta jalǵasýda.
Bilik ókilderi bul sheshimniń saiasi astary joq ekenin atap ótip, tyiym tek qaýipsizdik maqsatynda engizilgenin málimdedi. Degenmen, qoǵam belsendileri men eriktiler qoldanystaǵy shekteýlerge sai eske alý sharalaryn uiymdastyrýdyń jańa joldaryn qarastyrýda.
