قازاقستاننىڭ "ماڭگىلىك پولك" اكسياسىن وتكىزۋدەن باس تارتۋى رەسەيدە "اشىقتان-اشىق دوستىقسىز قادام" دەپ باعالاندى، دەپ حابارلايدى Dalanews.kz.
رەسەيلىك "گوسنوۆوستي" پورتالىنىڭ اۆتورلارى قازاقستاندا "ماڭگىلىك پولك" شەرۋىنىڭ وتپەۋىنە بىرنەشە سەبەپ اتايدى. ولاردىڭ پىكىرىنشە، بۇل شەشىم ارقىلى قازاقستان ۋكرايناعا ءوزىنىڭ بەيتاراپتىعىن كورسەتكىسى كەلەدى. سونىمەن بىرگە، استانا ءوزىنىڭ دەربەستىگىن ءبىلدىرىپ، ەلدىڭ "كىشى باۋىر" رولىنە كونگىسى كەلمەيتىنىن اڭعارتىپ وتىر.
الايدا باسىلىم شولۋشىسى باستى سەبەپ رەتىندە قازاقستان مەن جۇڭگو اراسىنداعى بايلانىستى اتايدى.
"سوڭعى جىلدارى قازاقستان "ءبىر بەلدەۋ — ءبىر جول" مەگاباعدارلاماسى اياسىندا ينفراقۇرىلىمدىق جوبالاردى دامىتۋ ءۇشىن پەكيننەن قوماقتى نەسيەلەر الدى. بۇل نەسيەلەر جاي عانا قارجىلىق كومەك ەمەس ەدى: ولار ستراتەگيالىق سالالارعا قىتايلىق كومپانيالاردىڭ قولجەتىمدىلىگىن اشۋ، بىرلەسكەن ونەركاسىپتىك ايماقتار قۇرۋ، قازاق دالاسى ارقىلى ەۋروپاعا باراتىن كولىك دالىزدەرىن دامىتۋ مىندەتتەرىمەن بىرگە كەلدى.
ناتيجەسىندە قازاقستان قىتايدىڭ ينفراقۇرىلىمدىق جەلىسىنە قوسىلىپ، رەسەي ەمەس، قىتايدىڭ ۇلكەن ەۋرازيالىق "قاۋىپسىزدىك بەلدەۋىنىڭ" ءبىر بولىگىنە اينالدى. قازاقستاننىڭ جۇڭگو جوبالارىنا ينتەگراسياسى تەرەڭدەگەن سايىن رەسەيگە ساياسي قادام جاساۋعا مۇمكىندىك ازايا تۇسۋدە، ءتىپتى ول ورتاق تاريحي جادى سەكىلدى سيمۆوليكالىق دەڭگەيدە بولسا دا"، — دەپ جازادى باسىلىم.
ەسكە سالساق، قازاقستاندا "ماڭگىلىك پولك" شەرۋىنىڭ ورنىنا "باتىرلارعا تاعزىم" اتتى ونلاين-اكسيا ۇيىمداستىرۋ تۋرالى شەشىم قابىلدانعان. ارنايى ازىرلەنگەن پورتالعا ارداگەرلەر تۋرالى كەڭ ءارى ۇنەمى جاڭارتىلىپ وتىراتىن دەرەكتەر بازاسى ورنالاستىرىلعان. بۇگىندە مۇندا 677 000-نان استام ارداگەردىڭ دەرەكتەرى بار، ولاردىڭ ىشىندە 365 كەڭەس وداعىنىڭ باتىرى، ەكى مارتە باتىر اتاعىن العان ءتورت ادام جانە داڭق وردەنىنىڭ 19 يەگەرى تىركەلگەن.
"پورتال ينتەرفەيسى قاجەتتى اقپاراتتى تابۋعا عانا ەمەس، سونىمەن بىرگە سايتقا ءوز تۋىستارى-ارداگەرلەر تۋرالى مالىمەت قوسۋدى جانە سوڭعى جاڭالىقتارمەن تانىسۋدى دا مۇمكىن ەتەدى"، — دەپ حابارلادى مادەنيەت مينيسترلىگى.
بۇعان دەيىن "ماڭگىلىك پولك" شەرۋىن وتكىزۋگە تىيىم سالىنعانىنا قاراماستان شاراعا قاتىسۋ تۋرالى ۇسىنىستار تۇسكەنىن جازعان ەدىك.
تەلەگرام ارنالاردا "ماڭگىلىك پولك" شەرۋىن وتكىزۋ تۋرالى ۇسىنىستار تۇسە باستاعان. شاراعا قاتىسقان ادامدارعا اقشالاي سىيلىق قاراستىرىلعان.
ايتا كەتەيىك، 2025 جىلى قازاقستاندا ەكىنشى دۇنيەجۇزىلىك سوعىس ارداگەرلەرىن ۇلىقتاۋعا ارنالعان ءداستۇرلى "ماڭگىلىك پولك" شەرۋىن وتكىزۋگە رەسمي تۇردە تىيىم سالىندى. بيلىك وكىلدەرى مۇنداي شەشىمدى قاۋىپسىزدىك شارالارىمەن، قوعامدىق ءتارتىپتى ساقتاۋ قاجەتتىلىگىمەن جانە حالىقارالىق جاعدايدىڭ تۇراقسىزدىعىمەن ءتۇسىندىردى.
شەرۋدىڭ ورنىنا بيىل ەسكە الۋ شارالارىن ونلاين فورماتتا وتكىزۋ ۇسىنىلدى. ۇيىمداستىرۋشىلار ازاماتتاردى تۋىستارىنىڭ سۋرەتتەرىن الەۋمەتتىك جەلىلەردە جاريالاپ، ەستەلىك شارالارىنا ۆيرتۋالدى تۇردە قاتىسۋعا شاقىرىپ وتىر.
شەرۋگە تىيىم سالۋ قوعامدا ەكىۇشتى پىكىر تۋدىردى. ءبىر تاراپ بۇل شەشىمدى تاريحي جادىنى شەكتەۋ دەپ باعالاسا، ەكىنشىسى قاۋىپسىزدىكتى ءبىرىنشى ورىنعا قويعان دۇرىس دەيدى. الەۋمەتتىك جەلىلەر مەن فورۋمداردا بالاما جولدار مەن ەسكە الۋ راسىمدەرىنىڭ باسقا نۇسقالارى قىزۋ تالقىلانۋدا.
ايتا كەتەيىك، ورتالىق ازيا ەلدەرى اراسىندا 2025 جىلى مۇنداي شەرۋ وتكىزۋگە تەك قازاقستاندا عانا تىيىم سالىنعان. وزگە ەلدەردە ەسكە الۋ شارالارى ءتۇرلى فورماتتا جالعاسۋدا.
بيلىك وكىلدەرى بۇل شەشىمنىڭ ساياسي استارى جوق ەكەنىن اتاپ ءوتىپ، تىيىم تەك قاۋىپسىزدىك ماقساتىندا ەنگىزىلگەنىن مالىمدەدى. دەگەنمەن، قوعام بەلسەندىلەرى مەن ەرىكتىلەر قولدانىستاعى شەكتەۋلەرگە ساي ەسكە الۋ شارالارىن ۇيىمداستىرۋدىڭ جاڭا جولدارىن قاراستىرۋدا.
