Premer-ministr Oljas Bektenov birneshe ákimge shúilikti,- dep habarlaidy Dalanews.kz.
Premer-ministr Oljas Bektenovtiń tóraǵalyǵymen ótken Úkimet otyrysynda "Aýylda densaýlyq saqtaýdy jańǵyrtý" ulttyq jobasynyń iske asyrylý barysy qaraldy.
Densaýlyq saqtaý ministri Aqmaral Álnazarova ulttyq jobada kózdelgen 655 nysannyń ishinen búginde 467 meditsinalyq mekemeniń qurylysy aiaqtalǵanyn, 2025 jyly taǵy 188 meditsinalyq-sanitariialyq alǵashqy kómek nysanynda jumystardy aiaqtaý josparlanǵanyn baiandady.
Premer-ministr Memleket basshysynyń bastamasy boiynsha júzege asyrylyp jatqan Ulttyq joba aýyldyq eldi mekenderde meditsinalyq kómek kórsetý sapasyn jaqsartýda sheshýshi mańyzǵa ie ekenin jáne 650-den asa aýyldyq jerde zamanaýi densaýlyq saqtaý nysandaryn ashýdy kózdeitinin atap ótti.
"Joba, birinshiden, aýyldyq jerdegi meditsinalyq kómekti qoljetimdi etý úshin birqatar keshendi máseleni sheshýge yqpal etedi. Iaǵni azamattar ózderiniń turǵylyqty jerinde shuǵyl kómekke qol jetkize alady. Ekinshiden, zamanaýi qural-jabdyqtar esebinen meditsinalyq qyzmetterdiń sapasy jaqsarady. Ulttyq jobanyń negizgi maqsaty da - osy", - dedi Oljas Bektenov.
Otyrysta ministrler men qurylys qarqynynda táýekelder bar birqatar óńir ákimderi tyńdaldy. Tiisti tapsyrmalar berildi.
Bektenovtiń sózinshe, búgingi tańda bes oblysta qurylys jumystary tolyǵymen aiaqtalǵan: Qostanai, Qyzylorda, Mańǵystaý, Túrkistan oblystarynda jáne Soltústik Qazaqstan oblysynda. Basqa óńirlerde ulttyq jobany júzege asyrýda belgili bir máseleler bar eken.
"Qurylys qarqyny boiynsha máselege ushyraǵan óńirler: Jetisý, Ulytaý, Jambyl, Aqtóbe, Aqmola jáne Qaraǵandy. Alty nysannyń jobalyq qujattamasy áli ázirlenbegen. Qaraǵandy, Qostanai, Aqmola, Batys Qazaqstan jáne Soltústik Qazaqstan oblystaryndaǵy segiz jobaǵa memlekettik saraptama júrgizilmegen. Oblys ákimderiniń jobalaý jáne qurylys protsesteri ýaqtyly júrgizilýin jetkiliksiz baqylaýy jobany iske asyrýdyń keshigýine ákep soǵady", - dedi premer-ministr.
