Búgin Mańǵystaý oblysynda bolǵan qaiǵyly oqiǵa saldarynan qaza tapqan Batys Qazaqstan oblysynyń áskeri qyzmetshilerin jerleý rásimderi ótti, dep habarlaidy dalanews.kz.
Qaraly jiyndarǵa Batys Qazaqstan oblysynyń ákimi Nariman Tóreǵaliev, QR Quryltaiynyń depýtattary Turarbek Tilemisov pen Muratbek Muhamediev, BQO prokýrory Nurbek Ulasbekuly, Qarýly Kúshterdiń ókilderi, belgili qoǵam qairatkerleri men óńir turǵyndary qatysty.
Qatysýshylar qaza tapqan jaýyngerlerdiń týǵan-týystary men jaqyndaryna qaiǵyryp kóńil aitty. Otan qorǵaýshylardyń rýhyna Quran baǵyshtaldy.
"Memleket basshysynyń tapsyrmasyna sáikes qaza tapqan áskeri qyzmetshilerdiń otbasylaryna memlekettik áleýmettik tólemder, materialdyq qoldaý jáne janaza men jerleý rásimderin uiymdastyrýǵa qajet jan-jaqty kómek kórsetilip jatyr. Qarjylai kómekti jinaqtaý úshin buǵan deiin arnaiy qor belgilendi. Jinaqtalǵan qarajattyń barlyǵy qaza tapqandardyń otbasylary men zardap shekkenderge ataýly ári ashyq túrde baǵyttalady. Bul jumys memlekettik jáne quqyq qorǵaý organdarynyń qatań baqylaýynda bolady", - dep jazylǵan óńir ákimdigi habarlamasynda.
Eske salsaq, qaiǵyly oqiǵa 24 qyrkúiekte Mańǵystaý oblysynda Áskeri-teńiz kúshteriniń oqý-jattyǵýy kezinde bolǵan. Sýǵa ketken 17 áskeri qyzmetshiniń 14-i qaza tapty, úsheýi qutqaryldy.
Osyǵan bailanysty 25 qyrkúiek - Qazaqstanda jalpyulttyq aza tutý kúni bolyp jariialandy.
Qaiǵyly oqiǵaǵa qatysty 12 saraptama taǵaiyndaldy. Sonymen qatar, tragediiaǵa bailanysty kúdiktiler anyqtaldy. Qorǵanys ministrliginen bes adam ustaldy.
