Búgin Mańǵystaý oblysynda áskeri boryshyn óteý kezinde qaza tapqan áskeri qyzmetshilermen qoshtasý rásimi ótti, dep habarlaidy dalanews.kz.
Qaraly rásimge Mańǵystaý oblysynyń ákimi Nurdáýlet Qilybai, Qazaqstan Respýblikasynyń qorǵanys ministri Dáýren Qosanov, Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly, Ulttyq quryltai músheleri, "Qazaqstan Halyq Keńesiniń" músheleri, sondai-aq, qoǵam qairatkerleri, marqumdarmen qyzmettes bolǵan azamattar qatysty.
Rásimge qatysýshylar qaza tapqan jaýyngerlerdiń týǵan-týysy men jaqyndaryna orny tolmas qaiǵyǵa ortaqtasyp, kóńil aitty. Otan qorǵaýshylardyń rýhyna Quran baǵyshtaldy.
"Memleket basshysynyń tapsyrmasyna sáikes qaza tapqan áskeri qyzmetshilerdiń otbasylaryna memlekettik áleýmettik tólemder, materialdyq qoldaý jáne janaza men jerleý rásimderin uiymdastyrýǵa qajet jan-jaqty kómek kórsetilip jatyr. Qarajatty jinaqtaý maqsatynda Mańǵystaý oblysynyń ákimdigi tarapynan buǵan deiin arnaiy qor aiqyndalǵan bolatyn. Jinaqtalǵan barlyq qarajat qaza tapqan áskeri qyzmetshilerdiń otbasylaryna jáne zardap shekkenderge ataýly ári ashyq túrde, memlekettik jáne quqyq qorǵaý organdarynyń qatań baqylaýymen baǵyttalady", - dep jazylǵan óńir ákimdigi habarlamasynda.
Eske salsaq, qaiǵyly oqiǵa 24 qyrkúiekte Mańǵystaý oblysynda Áskeri-teńiz kúshteriniń oqý-jattyǵýy kezinde bolǵan. Sýǵa ketken 17 áskeri qyzmetshiniń 14-i qaza tapty, úsheýi qutqaryldy.
Osyǵan bailanysty 25 qyrkúiek - Qazaqstanda jalpyulttyq aza tutý kúni bolyp jariialandy.
Qaiǵyly oqiǵaǵa qatysty 12 saraptama taǵaiyndaldy. Sonymen qatar, tragediiaǵa bailanysty kúdiktiler anyqtaldy. Qorǵanys ministrliginen bes adam ustaldy.
