Astana sotynda Qýandyq Bishimbaevtyń ata-anasynyń talap-aryzy qaralyp jatyr, - dep habarlaidy Dalanews.kz.
Nege.kz málimetinshe, Astana qalasynyń Azamattyq ister jónindegi aýdanaralyq sotynda Ýálihan Bishimbaev pen Almira Nurlybekovanyń Qairat Kemelovke qarsy abyroi men qadir-qasietti qorǵaý týraly aryzy qaralyp jatyr.
Qańtarda AIRAN YouTube arnasynda Bishimbaevtyń anasy óziniń týysy Bekzat Kemelovaǵa qarsy qylmystyq is qozǵaýǵa bastamashy bolǵany týraly material shyqqan.
Boljam boiynsha Bekzat Kemelova olardan 1 million dollardy aldap alǵan jáne keiin qaitarýdan bas tartqan. Kúdiktiniń kúieýi, sot-meditsina sarapshysy Qairat Kemelovtyń aitýynsha, Almira Nurlybekova Saltanat Núkenovanyń ólimine qatysty is boiynsha saraptama qorytyndysyna yqpal etýden bas tartqany úshin olardan osylaisha kek alyp otyr.
Bishimbaevtar otbasynyń advokaty Erlan Ǵazymjanov basylymǵa oqiǵanyń mán-jaiyn aityp bergen.
"Tergeý amaldary júrip jatqanda Bishimbaevtardyń úiine Bekzat Kemelova kelip (týysy Qairat Kemelovtiń áieli – esk.) "Antikorda jumys isteitin kúieýbalamnan estip-bildim, "Qýandyqtyń týystarynyń úiine tintý júrgizedi eken. Tizimde 30 adam tur, tek bizdiń familiia joq" dep aitty. Sondyqtan úiińizde qymbat, baǵaly dúnieler nemese aqsha bolsa, bekerden-beker kúiip ketpesin. Odan da biz alyp, saqtap bereiik. Kerek kezde alasyz ǵoi..." – dep sendirip ári psihologiialyq qysym jasap, qorqytady. Eń qyzyǵy ol bul áreketin kúieýine aitpaǵan kórinedi.
Esińizde me, dál sol ýaqytta aqparat quraldarynda "Bulardyń búkil aqshasyn tekserý kerek! Bárin tartyp alyp qoiý kerek!" degen jazbalar kóbeidi ǵoi. Odan keiin Núkenovanyń ákesi "Bishimbaevtar bailyǵyn tekserýdi talap etemin. Olar aqshany qaidan taýyp jatyr?" degen sarynda Prezidentke ashyq úndeý joldaǵan.
Bul bar, ekinshi jaǵynan álgi týysynyń aitqany bar, Almira Nurlybekova basynda tartynshaqtaǵandai bolady. Biraq oilana kele, týysyna senip, 1 mln dollaryn beredi. Ekinshiden, aiaq astynan dollar ósip ketkende jiǵan-tergeni sál de bolsa saqtalady dep oilasa kerek. Sodan eshqandai tintý sharasy júrgizilgen joq. Sot ótip, Qýandyq Bishimbaevqa jaza taǵaiyndalǵan soń, Almira nesiesin, shyǵynyn tóleý úshin aqshasyn suraidy. Biraq nege ekeni belgisiz, kúnde "erteń", "kelesi apta" dep júrip, aqyr sońynda "Bizde eshqandai aqsha joq. Biz sizderge eshteńe bere almaimyz" dep sózinen taiqyp shyqqan", - degen advokat.
