Astana áýejaiynda 1 qazanda Túrkiianyń Ystambul qalasynan ushyp kelgen Ýkraina azamaty Liýbov Rojanskaia ustaldy. Bul týraly Deutsche Welle basylymy advokattarǵa silteme jasap málimdedi, dep habarlaidy dalanews.kz.
Málimetke sáikes, qazaqstandyq shekarashylar áieldi Reseidiń suraýy boiynsha UQShU arnalary arqyly ustaǵan. Resei tarapy ony óz nemeresin urlady dep aiyptap otyr. Qazir Liýbov Rojanskaia Astanadaǵy tergeý izoliatoryna qamalǵan. Aldaǵy úsh táýlikte sot onyń Reseige ekstraditsiialanýy máselesin qaraidy.
Advokat Aleksei Prianishnikovtyń aitýynsha, Rojanskaia Qazaqstanǵa jeti jastaǵy nemeresin alyp, Ýkrainaǵa qaitarý úshin kelgen. Bul is birneshe jyldan beri jalǵasyp kele jatqan halyqaralyq sipattaǵy otbasylyq daýǵa bailanysty.
Basylymnyń jazýynsha, balanyń anasy Alla Andreeva 2021 jyly ulymen birge Reseidiń Kaliningrad oblysyna kóship ketken. Keiin ol Ýkraina azamattyǵynan bas tartýǵa ótinish berip, ózine jáne balasyna Resei azamattyǵyn rásimdegen. Alaida Ýkrainanyń Joǵarǵy soty balanyń týǵan ákesiniń talap-aryzy boiynsha ony Odessaǵa qaitarý jóninde sheshim shyǵaryp, resmi turǵylyqty jeri retinde osy qalany belgilegen.
Rojanskaianyń qorǵaýshylary onyń Astanaǵa kelýin Resei arnaiy qyzmetteri uiymdastyrǵan aldyn ala josparlanǵan áreket dep sanaidy. Advokattardyń málimetinshe, 2026 jyldyń shildesinde balanyń ógei ákesiniń reseilik týystary áielmen bailanysqa shyǵyp, balany óz erkimen berýge daiyn ekenderin aitqan.
Sonymen qatar qorǵaýshylardyń aitýynsha, kelissózder júrip jatqan kezde Kaliningradtyń Ortalyq aýdandyq soty Rojanskaiany syrttai qamaýǵa alý týraly sheshim shyǵaryp, ony izdeýge jariialaý úshin qajetti qujattardy daiyndaǵan. Qazaqstanda jumys isteitin advokat Riza Nurbaevanyń sózinshe, Liýbov Rojanskaia ózine qatysty Reseide qylmystyq is qozǵalǵanynan habarsyz bolǵan, óitkeni ol eshqashan Resei aýmaǵyna kirmegen.
Al advokat Aleksei Prianishnikov bul istiń artynda Resei men Ýkraina arasyndaǵy soǵys jaǵdaiyna bailanysty saiasi astar bolýy múmkin dep esepteidi. Deutsche Welle málimetinshe, qazir áieldiń Reseige ekstraditsiialanýy máselesi qaralyp jatyr.
