Freedom Finance saýda platformasynyń jumysyndaǵy tehnikalyq aqaý dúisenbide Qazaqstan qor birjasyndaǵy (KASE) saýda-sattyq kólemine aitarlyqtai áser etti. Saýda alańynyń derekterine sáikes, aktsiialarmen jasalǵan saýda kólemi 552 mln teńgeden 271 mln teńgege deiin eki esege tómendep ketken. Sondai-aq baǵaly qaǵazdar segmentinde de aitarlyqtai quldyraý baiqalady: saýda kólemi - 238 mln teńge, al ótken aptanyń sońǵy saýda kúninde bul kólem 6,1 mlrd teńgeni quraǵan, dep habarlaidy Dalanews.kz.
Qazaqstandyq OD Consulting kompaniiasynyń basqarýshy seriktesi Arman Bataev mundai dinamikany naryqtaǵy eń iri oiynshylardyń biriniń qor birjasynda bolmaýymen tikelei bailanystyrady. Ol bul týraly óziniń Telegram arnasynda bylai dep jazdy:
"Jalpy, bul kompaniianyń ózi Qazaqstandaǵy eń iri broker bolyp tabylady. Ol naryqtyń 70%-yn qamtidy".
Aita ketsek, 28 sáýirde Freedom Broker qosymshasy men kompaniianyń saity aiaq-asty isten shyqty. Freedom kompaniiasy ózderinde keń kólemdi tehnikalyq aqaý oryn alǵanyn rastady. Tutynýshylaryn sabyrǵa shaqyrǵan kompaniia erteń tańerteńge deiin jaǵdai retteletinin aityp, tehnikalyq baǵytta jumystar júrgizip jatqandaryn jetkizgen.
Bul keleńsiz jait brokerdiń infraqurylymyna, sonyń ishinde "investitsiialyq kartalarǵa" da áser etti. Bir sózben aitqanda, qosymshalar men saittar isten shyǵyp, onlain saýda-sattyq da qoljetimsiz qaldy. Onyń ústine brokerlik qyzmetter men investitsiialyq kartalar boiynsha jumystarda da aqaýlar bar. Bul jaǵdaiǵa qatysty Freedom Holding Corp. CEO-sy Timýr Turlov málimdeme jasady.
"Erteńge deiin saýda-sattyq qoljetimsiz bolady. Freedom Broker saýda platformasy iadrosyndaǵy aqparatty óńdeý ortalyǵyna jaýapty mańyzdy bir jabdyq "ólip tynǵan". Bul jaǵdai jeksenbide bolǵan. Rezervtik serverge kóshý kezinde georezervtik ortalyqta da iri aqaý oryn aldy. Qazir infraqurylymdy bekap arqyly qalpyna keltirý jumystary júrgizilip jatyr. Munyń barlyǵy ýaqytta alady. Aqaýlyqqa bailanysty tolyqtai tergeý júrgizildi. Sondyqtan tańerteńge deiin bul máseleni sheshetin bolamyz. Eń bastysy, tutynýshylar málimetteri zardap shekken joq, jazylǵan esepter men ishki júiedegiler saqtaýly", dep jazdy ol keshe keshkisin Threads-taǵy paraqshasynda.
Al bul aqaýlyq birjadaǵy FRHC qunyna esh keri áser etpegen, kerisinshe ol 1.98%-ǵa ósken.
Ázirge, Freedom Broker jumys istep turǵan joq. Bul rette Týrlov: "Qalypqa keltirý jumystary áli júrip jatyr: qat-qabatymen. Qansha qalasaq ta úlgermei jatyrmyz, qazirgi basty maqsat - amerikalyq sessiianyń ashylýyna daiyn bolý. Búkil kúsh sol baǵytqa jumyldyrylǵan, al qalǵanyn sodan keiin mindetti túrde retteimiz" dep jazdy búgin jelide.
