Bıylǵy jyldyń alǵashqy jartysynda elimizde 70 myńnan astam páter salyndy. Bul — turǵyn úı qurylysy boıynsha rekordtyq kórsetkish. Alaıda qurylys qarqyny joǵary bolǵanymen, baspana baǵasy tómendemeı tur. Sebebi turǵyn úıge suranys áli de joǵary, al halyqtyń satyp alý múmkindigi shekteýli, dep habarlaıdy Dalanews.kz 31 arnaǵa silteme jasap.

Jańa úılerdiń kóptep salynyp jatqanyna qaramastan, baspana baǵasy sharyqtap tur. Máselen, maýsym aıynda bastapqy turǵyn úı baǵasy bir jylda 9,5 paıyzǵa ósken. Shymkentte – 16%, Almatyda – 15%, al elordada – 6%-ǵa jýyq qymbattaǵan. Qazir respýblıka boıynsha bir sharshy metrdiń ortasha quny — 527 myń teńge. Byltyr bul baǵa 488 myń teńge edi.

Sarapshylardyń aıtýynsha, qurylys kólemi artqanymen, suranys odan da joǵary. Al halyqtyń tólem qabileti shegine jetken. Páter alý jónindegi kelisimsharttar azaıǵan. Jáne bul jaǵdaı jyldyń sońyna deıin aıtarlyqtaı ózgermeıdi.

“Aı saıyn 45 myń satyp alý-satý kelisimin jasaý mejesine jete almaımyz. Sebebi aımaqtarda belsendilik 20 paıyzǵa, tipti odan da kópke tómendedi. Al iri qalalarda bul kórsetkish ózgermeli kúıde tur”, – deıdi jyljymaıtyn múlik naryǵynyń sarapshysy Aleksandr Pak.

Kóptegen qazaqstandyq jańa ıpotekalyq baǵdarlamalarǵa úmit artyp otyr. Alaıda mamandar aldaǵy jyldary ıpoteka sharttary da qoljetimsiz bola túsedi dep boljaıdy.

“Kelesi jyldan bastap baǵaǵa QQS-tyń ósýi, zańnamadaǵy ózgerister men dollar baǵamynyń qymbattaýy áser etedi. Sonyń saldarynan qurylys quny da artady. Óıtkeni ár sharshy metrdiń 50 paıyzy shetelden jetkiziletin materıaldardan turady”, – deıdi halyqaralyq jyljymaıtyn múlik sarapshysy Lev Tetın.

Sarapshylardyń boljamynsha, 2025 jyldyń sońyna deıin páter baǵasy taǵy 12–15 paıyzǵa ósýi múmkin.