Perizat Qairattyń isi boiynsha sot otyrysynda prokýror Mádina Orazalina qoǵamda rezonans týdyrǵan iste óz aiyptaý sózin aitty, dep habarlaidy Dalanews.kz.
Onyń málimdeýinshe, bul qylmystyq is – jai ǵana alaiaqtyq emes, «amanatqa qiianat jasap, adaldyq pen qaiyrymdylyq uǵymdaryn aiaqqa taptaǵannyń kórinisi».
«Búgin biz belgili qoǵam belsendisi Qairat Perizat pen onyń anasy Ǵaini Alashbaevaǵa qatysty sot isiniń sońyna keldik. Búgingi otyrysqa daiyndala otyryp, sózimdi «Izgiliktiń betperdesi» dep ataǵym keldi. Sózimdi eń aldymen, keń peiildi ári ary taza qazaq halqyna alǵys aitýdan bastaǵym keledi», – dedi prokýror.
Orazalinanyń aitýynsha, Perizat Qairat qaiyrymdylyqty betperde etip, eldiń senimine kirip, jeke bas paidasyna kenelgen.
«Endi óz paidasy úshin «qaiyrymdylyq» sózin jamylǵy etkisi kelgen kez kelgen adam bilýi tiis: halyq endi únsiz otyrmaidy, memleket kóz jumyp qaramaidy, al eldiń senimi sheksiz emes», – dedi prokýror.
Sóz sońynda prokýror ótkir tujyrym jasady.
«Sadaqa – mansaptyń quraly emes. Halyqtyń senimi – aqsha salynǵan ámiian da, sándi brend te emes. Ol – amanat. Al amanatqa qiianat jasaǵandar erte me, kesh pe, áshkerelenip, ádildik aldynda jaýap beredi», - deidi prokýror.
