پەريزات قايراتتىڭ ءىسى بويىنشا سوت وتىرىسىندا پروكۋرور ءمادينا ورازالينا قوعامدا رەزونانس تۋدىرعان ىستە ءوز ايىپتاۋ ءسوزىن ايتتى، دەپ حابارلايدى Dalanews.kz.
ونىڭ مالىمدەۋىنشە، بۇل قىلمىستىق ءىس – جاي عانا الاياقتىق ەمەس، «اماناتقا قيانات جاساپ، ادالدىق پەن قايىرىمدىلىق ۇعىمدارىن اياققا تاپتاعاننىڭ كورىنىسى».
«بۇگىن ءبىز بەلگىلى قوعام بەلسەندىسى قايرات پەريزات پەن ونىڭ اناسى عايني الاشبايەۆاعا قاتىستى سوت ءىسىنىڭ سوڭىنا كەلدىك. بۇگىنگى وتىرىسقا دايىندالا وتىرىپ، ءسوزىمدى «ىزگىلىكتىڭ بەتپەردەسى» دەپ اتاعىم كەلدى. ءسوزىمدى ەڭ الدىمەن، كەڭ پەيىلدى ءارى ارى تازا قازاق حالقىنا العىس ايتۋدان باستاعىم كەلەدى»، – دەدى پروكۋرور.
ورازالينانىڭ ايتۋىنشا، پەريزات قايرات قايىرىمدىلىقتى بەتپەردە ەتىپ، ەلدىڭ سەنىمىنە كىرىپ، جەكە باس پايداسىنا كەنەلگەن.
«ەندى ءوز پايداسى ءۇشىن «قايىرىمدىلىق» ءسوزىن جامىلعى ەتكىسى كەلگەن كەز كەلگەن ادام ءبىلۋى ءتيىس: حالىق ەندى ءۇنسىز وتىرمايدى، مەملەكەت كوز جۇمىپ قارامايدى، ال ەلدىڭ سەنىمى شەكسىز ەمەس»، – دەدى پروكۋرور.
ءسوز سوڭىندا پروكۋرور وتكىر تۇجىرىم جاسادى.
«ساداقا – مانساپتىڭ قۇرالى ەمەس. حالىقتىڭ سەنىمى – اقشا سالىنعان ءاميان دا، ءساندى برەند تە ەمەس. ول – امانات. ال اماناتقا قيانات جاساعاندار ەرتە مە، كەش پە، اشكەرەلەنىپ، ادىلدىك الدىندا جاۋاپ بەرەدى»، - دەيدى پروكۋرور.
