Almaty qalasynda mopedter men elektrsamokattardyń qozǵalysyn baqylaýǵa baǵyttalǵan is-shara bastalǵannan beri 637 ákimshilik quqyq buzýshylyq anyqtaldy,- dep habarlaidy Dalanews.kz
Anyqtalǵan óreskel quqyq buzýshylyqtardyń qatarynda:
• kólik quralyn alkogoldik mas kúide basqarý – 5 derek;
• memlekettik tirkeý nómirlik belgileriniń bolmaýy – 12;
• saqtandyrý polisinsiz basqarý – 46;
• jalǵan nómirlik belgilermen júrý – 1;
• júrgizý quqyǵynyń bolmaýy – 35;
• júrgizýshi kýáliginen aiyrylǵan adamdardyń kólik basqarýy – 4;
• tehnikalyq baiqaýdan ótpeý – 47;
• jaiaý júrginshiler ótkelinen ótý erejesin buzý – 8;
• rólde otyryp uialy telefon qoldaný – 12 derek.
Is-shara barysynda 131 moped arnaiy aiyppul turaǵyna qoiyldy. Sondai-aq moped júrgizýshileriniń qatysýymen 5 jol-kólik oqiǵasy tirkelip, 3 adam túrli jaraqat alǵan.
Almaty qalasy PD jergilikti politsiia qyzmeti basqarmasynyń bastyǵy Serik Shýmaevtyń aitýynsha, reidterdiń negizgi maqsaty – jol-kólik oqiǵalarynyń aldyn alý jáne jol qozǵalysyna qaýipsiz ári jaýapty kózqaras qalyptastyrý.
"2025 jyl – "Profilaktika jyly" dep jariialandy. Biz barlyq moped, elektrsamokat jáne balama kólik quralyn basqarýshylardy jol qozǵalysy erejelerin qatań saqtaýǵa shaqyramyz. Joldaǵy qaýipsizdik – sizderdiń jaýapkershilikterińizge tikelei bailanysty", – dedi Serik Shýmaev.
Jedel aldyn alý is-sharasy jalǵasýda. Politsiia azamattardy abai bolýǵa, jol erejelerin saqtaýǵa jáne ózge jol qozǵalysyna qatysýshylarǵa qurmetpen qaraýǵa shaqyrady.
