Búgin oblys ákimi Berik Ýáli men «China Railway Asia-Europe Construction Investment Co.LTD» kompaniiasynyń bas direktory Chjoý Haivei Semei qalasyn ainalyp ótetin avtojol qurylysyn júzege asyrýǵa baǵyttalǵan kelisimge qol qoidy,- dep habarlaidy Dalanews.kz
Joba qazaq-qytai kásiporyndarynyń birlesken konsortsiýmy negizinde biylǵy tamyz aiynda bastalyp, 2028 jylǵa deiin júzege asyrylady. Atalǵan bastama Qazaqstan Respýblikasynyń 2030 jylǵa deiingi kólik-logistikalyq áleýetin damytý tujyrymdamasy sheńberinde halyqaralyq qarjy institýttarymen birlesip iske asyrylatyn erekshe mańyzy bar jobalar tizbesine engizilgen.
Jańa ainalma joldyń salynýy oblystyń logistikalyq áleýetin arttyryp, toǵyz joldyń torabyndaǵy Semei qalasynyń kólik júktemesin azaitýǵa múmkindik beredi. Oblys ortalyǵyndaǵy aspaly kópir arqyly jylyna 700 myńǵa jýyq kólik ótedi.
Aimaq basshysy oblys turǵyndary úshin asa mańyzdy jobanyń tiisti jumystary bastalyp ta ketkenin atap ótti.
«Qazaq-qytai kásiporyndarynyń birlesken konsortsiýmy negizinde qol qoiylǵan kelisimge sai biyl tamyz-qyrkúiek ailarynda jobanyń tehnikalyq-ekonomikalyq negizdemesi jasalady. Al qazan, qarasha ailarynda ainalma joldyń aldyn ala jobasy ázirlenip, kópirler men jol aiyryqtary ákimdikpen kelisiledi. Qarasha, jeltoqsan ailarynda jumys jospary, qurylysqa daiyndyq ákimdikpen kelisiledi. Sodan keiin baryp Semei qalasyn ainalyp ótetin avtojol qurylysy bastalady. Bul kelisim bizdiń elder arasyndaǵy uzaq merzimdi ári ózara tiimdi yntymaqtastyqtyń negizine ainalyp, Eýraziiadaǵy halyqaralyq kólik dálizderiniń damýyna aitarlyqtai úles qosatynyna senimdimin», – dedi oblys ákimi.
Óz kezeginde qytailyq kompaniia ókilderi jumysty bastaýǵa daiyn ekenin jetkizdi.
«Eki el dostyǵynyń arqasynda júzege asqan Astana qalasyndaǵy LRT qurylysyna qatysyp jatyrmyz. Bizdiń kompaniia bul jobaǵa byltyrdan bastap aralasyp, birqatar jaqsy nátijelerge qol jetkizdik. Osy tájiribemizdi Semei qalasyndaǵy ainalma jol qurylysy kezinde iske asyramyz dep oilaimyn», - dedi Chjoý Haivei.
