Almatydaǵy №1 oblystyq balalar úiinde qalyptasqan ahýalǵa bailanysty Prezident ákimshiligi arnaiy komissiia qurdy. Bul týraly Aqordanyń baspasóz qyzmeti habarlady, dep habarlaidy Dalanews.kz.
Komissiia músheleri balalar úiiniń tárbielenýshilerimen, mekeme basshylyǵy jáne qyzmetkerlerimen, sondai-aq bilim salasynyń ókilderimen kezdesti. Olar balalardyń turmystyq jaǵdaiymen, bilim alý jáne ómir súrý jaǵdailarymen, ǵimarat pen oǵan jaqyn ornalasqan infraqurylymnyń ahýalymen tanysty.
«Qazirgi ýaqytta komissiia balalar úiin kóshirý týraly sheshim qabyldaýǵa bailanysty barlyq qujattardy jan-jaqty tekserip, taldaýda. Komissiia músheleri ásirese jetim balalarǵa qatysty áleýmettik jáne quqyqtyq kepildikterdiń oryndalýyna erekshe kóńil bóledi. Tekserý barysynda basty nazar balalardyń quqyqtary men múddelerin qorǵaýǵa baǵyttalǵan», – delingen Prezident ákimshiligi taratqan habarlamada.
Osyǵan bailanysty Almaty oblysynyń ákimdigi de óz tarapynan qyzmettik tekseris bastaǵanyn habarlady. Ákimdiktiń málimetinshe, jedel keńes ótip, basqarýshylyq sheshimderde qatelikterge jol bergen tulǵalardyń jaýapkershiligin anyqtaý jáne tiisti sharalardy qabyldaý tapsyryldy.
«Osy másele boiynsha qyzmettik tekseris bastaldy. Basqarý sheshimderinde kemshilikterge jol bergen laýazymdy tulǵalar tártiptik jaýapkershilikke tartylady», – dedi ákimdik ókilderi.
Ákimdiktiń aitýynsha, qazirgi tańda balalar úiiniń tárbielenýshileri burynǵy mekenjaiy boiynsha Almatyda bilim alyp, sol jerde tura beredi. Al erikti túrde jańa ǵimaratqa – Qonaev qalasyndaǵy oblystyq balalar úiine kóshkisi kelgen tárbielenýshilerge múmkindik beriledi.
Sondai-aq, Baganashyldaǵy balalar úiiniń ǵimaratyn Almaty qalasynyń ákimdigi balansyna berý máselesi memlekettik organdar arasynda pysyqtalýda.
Almaty oblysy ákimdiginiń málimetinshe, Qonaev qalasyndaǵy jańa ǵimaratqa osy kezge deiin Kámeletke tolmaǵandardy beiimdeý ortalyǵynyń 39 tárbielenýshisi óz erikterimen kóshken. Olardyń ishinde Almatydaǵy balalar úiiniń tárbielenýshileri joq.
