Qazaqstandaǵy bankterdiń biri alaiaqtyq baby boiynsha sotqa tartylyp jatqan Perizat Qairat basqarǵan qorǵa halyqty aqsha aýdarýǵa shaqyrǵan. 2024 jyldyń kókteminde Eýraziialyq bank óziniń mobildi qosymshasynda sý tasqynynan zardap shekkenderge qaiyrymdylyq tanytý týraly habarlandyrý ornalastyrady. Qaiyrymdylyq uiymdarynyń tiziminde birinshi bolyp "Biz Birgemiz Qazaqstan 2030" qory turǵan, dep habarlaidy Dalanews.kz.
Telegram arnalardyń birindegi aqparatqa sáikes, bank habarlamasynda tikelei qosymsha arqyly aqshany tez aýdarýǵa bolatyndyǵy aitylǵan.
"Daýǵa basy shatylǵan qorǵa qarajat jinaý týraly aqparat Eýraziialyq banktiń resmi saitynda áli de qoljetimdi", – dep atap kórsetedi derekkóz.
Tergeý málimetteri boiynsha, jinalǵan qarajattyń basym bóligi zardap shekkenderge jetpegen. Aqshany qarapaiym azamattar, mektepter, kásipkerler, tipti muqtaj jandarǵa kómektesetinine senimdi bankter de aýdardy. Zalal somasy ondaǵan million teńgege baǵalanady.
Ile-shala Eýraziialyq bank atalǵan oqiǵaǵa qatysty aqparat taratty.
"Eýraziialyq banki Biz Birgemiz Qazaqstan qorynyń ainalasyndaǵy jaǵdaiǵa bailanysty qoǵamdaǵy narazylyqqa qosylady. Bul jait qaiyrymdylyq uiymdaryn qatań tekserý qajettiligin taǵy bir márte tanytady. 2024 jyldyń sáýirinde, sý tasqyny kezinde sol kezdegi tanymal bolyp kóringen qordyń rekvizitteri klientterge yńǵaily bolý úshin Smartbank-ke qosyldy. Qor standartty tekserýden ótti jáne sol kezde eshqandai kúdik-kúmán týdyrmady. Banktiń qormen ym-jymy bir bolǵan emes, oǵan qarajat aýdarǵan joq, tek klientterge basqa ondaǵan qorlarǵa siiaqty oǵan da aqsha aýdarýlaryna tehnikalyq múmkindik jasady. Shý qalai shyqty, solai qordyń rekvizitteri júieden dereý alynyp tastaldy. Eýraziialyq bank óz atynan zardap shekkenderge naqty kómek kórsetken, tekserilgen qorlarǵa 10 mlrd teńge bóldi. Kómek qujat túrinde rastalǵan".
Aita ketsek, Biz Birgemiz Qazaqstan 2030 qorynyń basshysy Perizat Qairat alaiaqtyq jasaǵany úshin sottalýda.
Buǵan deiin Jusan Bank (qazirgi Alatau City Bank) ókili sotta sóz alyp, sý tasqyny kezinde bank Perizat Qairat qoryna qazaqstandyqtarǵa kómek retinde 300 million teńge aýdarǵanyn málimdegen.
Sondai-aq Kaspi Bank-tiń "Biz Birgemiz Qazaqstan 2030" qoǵamdyq qoryna 620 mln teńge aýdarǵany belgili boldy. Ol eki transh arqyly júrgizilgen: basynda 120 mln teńge, odan keiin qosymsha 500 mln teńge bólingen. Sotta bank zańgeri ózderine qor ataýy senim uialatqanyn aitty. "Sol kezde aty dúrkirep turdy. Kaspi Bank basshylyǵy osy qorǵa senim bildirý týraly sheshim qabyldady. Arty bulai bolatynyn eshkim boljamady. Biz odan qor týraly barlyq málimetterdi surap aldyrtyp, tekserdik. Biraq ol kezde qorǵa qatysty qandai da bir qylmystyq faktiler tirkelmegen edi. Onyń ústine Jusan Bank 300 mln teńge aýdarǵany týraly aqparat tarady. Biz de osy úlgini negizge aldyq", – dedi ol.
16 shildedegi sot otyrysynda NZM ata-analar komitetiniń tóraǵasy oqýshylardyń ata-analary sý tasqynynan zardap shekkenderge kómektesý úshin 901 myń teńge jinap, olardy Biz Birgemiz Qazaqstan 2030 qoryna tapsyrǵanyn habarlady. Biraq qor basshysyna qarsy qylmystyq is qozǵalǵany belgili bolǵannan keiin, ata-analar aqshany qaitarýdy talap etken. Olar bul aqshany naýqas muǵalim emine jumsaý týraly sheshim qabyldapty.
Taǵy bir jábirlenýshi pavlodarlyq zeinetker sotta qorǵa aýdarǵan 1 mln teńgeni keri qaitarýdy talap etti.
17 shildede jábirlenýshilerdiń biri - Nazarbaev Ziiatkerlik mektebiniń qyzmetkeri Janerke Satqanbekova Perizat Qairatpen bailanysty qorǵa 3 million teńgege jýyq qarajat aýdarǵanyn aitty. Sottalýshy óz kezeginde aqsha sý tasqynynan zardap shekkenderge kómek retinde taǵaiyndaldy dep málimdedi.
Bul is boiynsha Úkimet basshysy Oljas Bektenov alǵash ret zańdarǵa ózgerister engizýge ýáde berip, sóz sóiledi.
