قازاقستانداعى بانكتەردىڭ ءبىرى الاياقتىق بابى بويىنشا سوتقا تارتىلىپ جاتقان پەريزات قايرات باسقارعان قورعا حالىقتى اقشا اۋدارۋعا شاقىرعان. 2024 جىلدىڭ كوكتەمىندە ەۋرازيالىق بانك ءوزىنىڭ ءموبيلدى قوسىمشاسىندا سۋ تاسقىنىنان زارداپ شەككەندەرگە قايىرىمدىلىق تانىتۋ تۋرالى حابارلاندىرۋ ورنالاستىرادى. قايىرىمدىلىق ۇيىمدارىنىڭ تىزىمىندە ءبىرىنشى بولىپ "Biz Birgemiz Qazaqstan 2030" قورى تۇرعان، دەپ حابارلايدى Dalanews.kz.
Telegram ارنالاردىڭ بىرىندەگى اقپاراتقا سايكەس، بانك حابارلاماسىندا تىكەلەي قوسىمشا ارقىلى اقشانى تەز اۋدارۋعا بولاتىندىعى ايتىلعان.
"داۋعا باسى شاتىلعان قورعا قاراجات جيناۋ تۋرالى اقپارات ەۋرازيالىق بانكتىڭ رەسمي سايتىندا ءالى دە قولجەتىمدى"، – دەپ اتاپ كورسەتەدى دەرەككوز.
تەرگەۋ مالىمەتتەرى بويىنشا، جينالعان قاراجاتتىڭ باسىم بولىگى زارداپ شەككەندەرگە جەتپەگەن. اقشانى قاراپايىم ازاماتتار، مەكتەپتەر، كاسىپكەرلەر، ءتىپتى مۇقتاج جاندارعا كومەكتەسەتىنىنە سەنىمدى بانكتەر دە اۋداردى. زالال سوماسى ونداعان ميلليون تەڭگەگە باعالانادى.
ىلە-شالا ەۋرازيالىق بانك اتالعان وقيعاعا قاتىستى اقپارات تاراتتى.
"ەۋرازيالىق بانكى Biz Birgemiz Qazaqstan قورىنىڭ اينالاسىنداعى جاعدايعا بايلانىستى قوعامداعى نارازىلىققا قوسىلادى. بۇل جايت قايىرىمدىلىق ۇيىمدارىن قاتاڭ تەكسەرۋ قاجەتتىلىگىن تاعى ءبىر مارتە تانىتادى. 2024 جىلدىڭ ساۋىرىندە، سۋ تاسقىنى كەزىندە سول كەزدەگى تانىمال بولىپ كورىنگەن قوردىڭ رەكۆيزيتتەرى كليەنتتەرگە ىڭعايلى بولۋ ءۇشىن Smartbank-كە قوسىلدى. قور ستاندارتتى تەكسەرۋدەن ءوتتى جانە سول كەزدە ەشقانداي كۇدىك-كۇمان تۋدىرمادى. بانكتىڭ قورمەن ىم-جىمى ءبىر بولعان ەمەس، وعان قاراجات اۋدارعان جوق، تەك كليەنتتەرگە باسقا ونداعان قورلارعا سياقتى وعان دا اقشا اۋدارۋلارىنا تەحنيكالىق مۇمكىندىك جاسادى. شۋ قالاي شىقتى، سولاي قوردىڭ رەكۆيزيتتەرى جۇيەدەن دەرەۋ الىنىپ تاستالدى. ەۋرازيالىق بانك ءوز اتىنان زارداپ شەككەندەرگە ناقتى كومەك كورسەتكەن، تەكسەرىلگەن قورلارعا 10 ملرد تەڭگە ءبولدى. كومەك قۇجات تۇرىندە راستالعان".
ايتا كەتسەك، Biz Birgemiz Qazaqstan 2030 قورىنىڭ باسشىسى پەريزات قايرات الاياقتىق جاساعانى ءۇشىن سوتتالۋدا.
بۇعان دەيىن Jusan Bank (قازىرگى Alatau City Bank) وكىلى سوتتا ءسوز الىپ، سۋ تاسقىنى كەزىندە بانك پەريزات قايرات قورىنا قازاقستاندىقتارعا كومەك رەتىندە 300 ميلليون تەڭگە اۋدارعانىن مالىمدەگەن.
سونداي-اق Kaspi Bankء-تىڭ "Biz Birgemiz Qazaqstan 2030" قوعامدىق قورىنا 620 ملن تەڭگە اۋدارعانى بەلگىلى بولدى. ول ەكى ترانش ارقىلى جۇرگىزىلگەن: باسىندا 120 ملن تەڭگە، ودان كەيىن قوسىمشا 500 ملن تەڭگە بولىنگەن. سوتتا بانك زاڭگەرى وزدەرىنە قور اتاۋى سەنىم ۇيالاتقانىن ايتتى. "سول كەزدە اتى دۇركىرەپ تۇردى. Kaspi Bank باسشىلىعى وسى قورعا سەنىم ءبىلدىرۋ تۋرالى شەشىم قابىلدادى. ارتى بۇلاي بولاتىنىن ەشكىم بولجامادى. ءبىز ودان قور تۋرالى بارلىق مالىمەتتەردى سۇراپ الدىرتىپ، تەكسەردىك. ءبىراق ول كەزدە قورعا قاتىستى قانداي دا ءبىر قىلمىستىق فاكتىلەر تىركەلمەگەن ەدى. ونىڭ ۇستىنە Jusan Bank 300 ملن تەڭگە اۋدارعانى تۋرالى اقپارات تارادى. ءبىز دە وسى ۇلگىنى نەگىزگە الدىق"، – دەدى ول.
16 شىلدەدەگى سوت وتىرىسىندا نزم اتا-انالار كوميتەتىنىڭ ءتوراعاسى وقۋشىلاردىڭ اتا-انالارى سۋ تاسقىنىنان زارداپ شەككەندەرگە كومەكتەسۋ ءۇشىن 901 مىڭ تەڭگە جيناپ، ولاردى Biz Birgemiz Qazaqstan 2030 قورىنا تاپسىرعانىن حابارلادى. ءبىراق قور باسشىسىنا قارسى قىلمىستىق ءىس قوزعالعانى بەلگىلى بولعاننان كەيىن، اتا-انالار اقشانى قايتارۋدى تالاپ ەتكەن. ولار بۇل اقشانى ناۋقاس ءمۇعالىم ەمىنە جۇمساۋ تۋرالى شەشىم قابىلداپتى.
تاعى ءبىر جابىرلەنۋشى پاۆلودارلىق زەينەتكەر سوتتا قورعا اۋدارعان 1 ملن تەڭگەنى كەرى قايتارۋدى تالاپ ەتتى.
17 شىلدەدە جابىرلەنۋشىلەردىڭ ءبىرى - نازاربايەۆ زياتكەرلىك مەكتەبىنىڭ قىزمەتكەرى جانەركە ساتقانبەكوۆا پەريزات قايراتپەن بايلانىستى قورعا 3 ميلليون تەڭگەگە جۋىق قاراجات اۋدارعانىن ايتتى. سوتتالۋشى ءوز كەزەگىندە اقشا سۋ تاسقىنىنان زارداپ شەككەندەرگە كومەك رەتىندە تاعايىندالدى دەپ مالىمدەدى.
بۇل ءىس بويىنشا ۇكىمەت باسشىسى ولجاس بەكتەنوۆ العاش رەت زاڭدارعا وزگەرىستەر ەنگىزۋگە ۋادە بەرىپ، ءسوز سويلەدى.
