Kásipker, Qazaqstan men Grýziiadaǵy Forbes franshizasynyń iesi Armanjan Baitasov eks-prezident Nursultan Nazarbaevtyń týystarynyń Forbes Kazakhstan reitinginen birde kórinip, birde tizimnen túsip qalýyna qatysty pikir bildirdi, dep habarlaidy dalanews.kz.
Bul týraly ol jýrnalist Dmitrii Shishkinge bergen suhbatynda aitty.
Jýrnalist ár jyldary tuńǵysh prezidenttiń otbasy músheleri – Dariǵa Nazarbaeva, Qairat Satybaldy jáne Nurbol Nazarbaev Forbes tizimine enip, keiin reitingten shyǵyp qalǵanyna nazar aýdardy. Ol munyń qandai da bir qysymmen bailanysty bolǵan-bolmaǵanyn surady.
Armanjan Baitasovtyń aitýynsha, Forbes eń bai adamdar reitingin jasaǵan kezde tek ashyq derekkózderdegi málimetterge súienedi. Eger belgili bir adamnyń bailyǵy týraly aqparatty naqty rastaý múmkin bolmasa, basylym ondai derekti jariialamaýǵa tyrysady.
"Biz Forbes reitingterin jasaǵanda, ásirese eń aýqatty adamdar tiziminde tek ashyq derekkózderge súienemiz. Eger qandai da bir aqparat kúmán týdyrsa nemese ony dáleldeý qiyn bolsa, biz ony eskeremiz. Al naqty dáleldei almaitynymyzdy túsinsek, ol týraly múlde jazbaimyz", – dedi kásipker.
Baitasov Dariǵa Nazarbaevanyń reitingte birneshe ret bolǵanyn atap ótti. Ashyq derekterge sáikes, ol 2013 jyly 595 million dollarlyq dáýletimen tizimde 13-orynda turǵan. Keiin uzaq ýaqyt reitingten kórinbei, 2022 jyly 594 million dollar bailyǵymen qaitadan 13-orynǵa engen.
Qairat Satybaldy 2018 jyly 163 million dollarlyq dáýletimen reitingtiń 36-ornyn ielengen. Keiin ol tizimnen shyǵaryldy.
Al Nurbol Nazarbaev 2025 jyly 179 million dollarlyq bailyǵymen Forbes Kazakhstan tiziminde 57-orynda turǵan. Alaida biylǵy reitingke enbegen.
"Eger belgili bir aqparatty dáleldei almaitynymyzdy túsinsek, ózimizge artyq másele týdyrýdyń qajeti joq. Sebebi ondai jaǵdaida bizdi sotqa berýi múmkin. Sondyqtan bul máselege óte muqiiat qaraimyz. Al Nurbol Nazarbaevqa kelsek, jaǵdai túsinikti. Ol reitingke endi, keiin, qatelespesem, ózi bankrottyq týraly ótinish bergennen keiin tizimnen shyǵaryldy", – dedi Baitasov.
Kásipker aýqatty adamdardyń dáýletin baǵalaý kezinde aiyrmashylyq kóp bolýy múmkin ekenin de aitty. Onyń sózinshe, Qazaqstanda bailyǵy Forbes tizimine enýge jetetin adamdar az emes. Biraq basylym tek zańdy, ashyq jáne shyǵý tegi túsinikti aktivterdi ǵana esepke alady.
"Biz zańdy, ashyq ári qaidan kelgeni túsinikti qarajatty esepteimiz. Al qandai da bir dástúrli emes nemese qosymsha tabys kózderi arqyly alynǵan qarjyny kórmeimiz jáne ony anyqtaý bizdiń quzyretimizge kirmeidi. Biz salyq organy da, qarjy politsiiasy da, Ulttyq qaýipsizdik komiteti de emespiz", – dedi ol.
Baitasovtyń aitýynsha, basylym dáleldei almaityn málimetti reitingke qosa almaidy. Óitkeni kez kelgen aqparat naqty derekpen rastalýy kerek.
Aita keteiik, Armanjan Baitasovtyń ózi de Forbes Kazakhstan reitinginde bar. Onyń dáýleti 150 million dollar dep baǵalanyp, ol tizimde 60-orynda tur. Kásipker Tan Media Group jáne United Media Group kompaniialaryndaǵy úlesterge ielik etedi. Bul mediatoptardyń quramyna Forbes Kazakhstan, Forbes Georgia, Arbat Media, Business FM, Businessfm.kz, MuzzOne telearnasy jáne basqa da mediaaktivter kiredi.
