Aýyl sharýashylyǵy ministrligi Reseidegi janar-jaǵarmai naryǵyndaǵy dúrbeleńge qaramastan, qazaqstandyq diqandar dizel otynymen tolyq qamtamasyz etiletinin málimdedi, dep habarlaidy dalanews.kz.
Aýyl sharýashylyǵy vitse-ministri Azat Sultanovtyń aitýynsha, egis jáne egin kútimi jumystaryna qajetti janarmai kólemi jyl saiyn aldyn ala bekitiledi.
«Shynynda da, qazir kórshi eldiń janar-jaǵarmai naryǵynda belgili bir dúrbeleń baiqalyp otyr. Degenmen dál osyndai jaǵdailardyń aldyn alý úshin jyl saiyn aýyl sharýashylyǵy taýaryn óndirýshilerge kepildendirilgen kólemde dizel otyny bólinedi. Biyl kóktemgi dala jumystaryna 402 myń tonna dizel otyny bólindi. Jalpy biz jyl saiyn tarihi qalyptasqan kólem – shamamen 400 myń tonna dizel otynyn kóktemgi egis jumystaryna alamyz», – dedi Azat Sultanov Senat kýlýarynda.
Vitse-ministrdiń aitýynsha, kóktemgi egis kezinde paidalanylmai qalǵan dizel otynyn fermerler keiin egistikti kútip-baptaý, himiialyq óńdeý jáne súri jerlerdi óńdeý jumystaryna paidalana alady.
«Osylaisha fermerler men óńirler ózderi suratatyn jalpy kólem shamamen 800 myń tonnany quraidy. Bul kórsetkishke dándi jáne maily daqyldardy keptirýge qajetti janar-jaǵarmai kirmeidi. Barlyq kólem belgilengen kestege sáikes jetkizilip jatyr. Ár óńir belgili bir munai óńdeý zaýytyna bekitilgen jáne osy ýaqytqa deiin zaýyttar tarapynan mindettemelerdiń oryndalmai qalǵan jaǵdaiy bolǵan emes. Sondyqtan fermerlerde dala jumystary ýaqytynda júrgizilmei qalady degen qaýip joq dep esepteimiz», – dedi ol.
Aita keteiik, buǵan deiin Reuters agenttigi Reseidiń ishki naryqtaǵy tapshylyqqa bailanysty Qazaqstannan benzin importtaý máselesin talqylap jatqanyn habarlaǵan bolatyn.
