Qazaq ónerin biikke kótergen – Mariia Mýdriak
«100 jańa esim» jobasyna laiyqty, elimizdiń ataq-abyroiyn asqaqtatyp júrgen talanttardyń biri – Mariia Mýdrak. Iá, ata-babalarymyz «qyz ósse eldiń kórki» dep beker aitpaǵan. Al boijetken qyz ónerpaz bolsa, barsha jurttyń maqtanyshy bolmaq. Bulai deitin sebebimiz, Mariia jas kezinde-aq Niderlandynyń astanasy Amsterdamda ótken «Beivebere» klassikalyq án baiqaýynda álemniń on úzdik sopranolardyń qataryna enip, abyroiymyzdy asqaqtatqanyn umytqan joqpyz.
Pavlodardyń týmasy Mariia Mýdriak 18 jasynda Djýzeppe Verdi atyndaǵy Milan memlekettik konservatoriiasyn támámdaǵan. On jasynda La Skala teatrynyń janyndaǵy milandyq joǵary mýzyka mektebine qabyldanyp, keiin Memlekettik konservatoriiaǵa túsip, eń jas stýdent atanǵany belgili.
Oǵan deiin, álemniń eń jas opera ánshisi retinde, iaǵni bes jasynda Ginnestiń rekordtar kitabyna endi.
«Beivebere» baiqaýy álemdegi eń bedeldi klassikalyq án baiqaýy sanalady. Qazirgi tańda Eýropa men Amerikada tanymal ánshilerdiń barlyǵy osy baiqaýdan qanat qaǵyp, tanymaldylyqqa ie bolǵan. Atalmysh konkýrstyń irikteý kezeńi álemniń 50-den astam elderinde ótkizilip, tek júzden júirik, myńnan tulpar shyqqandar ǵana baiqaýdyń aqtyq kezeńine jiberiletinin eskersek, Mariia úzdikterdiń qatarynan kórinýi úshin qanshalyqty ter tókkenin baiqaýǵa bolady.
Elbasymyz Nursultan Nazarbaevtyń ózi ánshiniń bedeldi án baiqaýǵa qatysýyn jón kórip, Mariianyń Amsterdamdaǵy ándodaǵa barý kerektigi týraly keńes bergen.
Ánshiniń anasy Olga Genrihqyzy Mariia «Beivebere» baiqaýyna kúni-túni daiyndalǵanyn aitqan-dy. «Qyzyma irikteý kezeńinen ótý óte qiynǵa soqty. Sebebi, 500 qatysýshynyń ishinen sýyrylyp shyǵý degen ekiniń biriniń qolynan kelmesi anyq. Rim jáne Milanda ótken irikteý kezeńinde Mariia joǵary ball alyp, ádilqazylardyń oń baǵasyna ie boldy. Mariia sahnaǵa qazaq eliniń namysyn arqalap shyqty», – sol bir sáýleli sátti eske aldy.
Mariia Mýdraktyń aýqymdy óner dodasynda úzdikter qatarynan kórinýi onyń talai jylǵy bilimi men biliginiń arqasy ekendigi ámbege aian. Aty kúlli álemge máshhúr bolǵan Mariianyń daýsyna qazaq jurty da yntyq.
Elbasy Nursulan Nazarbaev usynǵan «100 jańa esim» jobasyna Mariiadai talantty ul-qyzdarymyz oiyp turyp oryn alýy kerek. Álemdik deńgeide kóterilip, Qazaqstannyń atyn álemge tanytqan óner ieleri kóp emes. Sondyqtan mundai aiaýly qyzdarymyzdy qurmettep, olardyń ómir jolyn óskeleń urpaqqa úlgi-ónege qylyp otyrýdyń mańyzy zor dep esepteimiz.
Nurlan Jumahan
