Almatyda meditsinalyq jabdyqtardy paidalaný kezinde ólshem birligin qamtamasyz etý salasyndaǵy óreskel zańbuzýshylyqtar anyqtaldy, dep habarlaidy Dala News.
Tekserýdi QR Saýda jáne integratsiia ministrligi Tehnikalyq retteý jáne metrologiia komitetiniń departamenti júrgizgen. Jospardan tys baqylaý nátijesinde «Ortalyq qalalyq klinikalyq aýrýhana» ShJQ KMK qyzmetinde birqatar talaptardyń saqtalmaǵany belgili boldy.
Atap aitqanda, 2026 jylǵy 11 aqpanǵa deiin meditsinalyq mekemede 106 patsient monitoringi modýli mindetti rásimderden ótpei paidalanylǵan. Bul jabdyqtar tipin bekitýsiz nemese metrologiialyq attestatsiiasyz qoldanylǵan, memlekettik reestrde tirkelmegen jáne mindetti tekserýden ótpegen. Soǵan qaramastan, olar patsientterge meditsinalyq kómek kórsetý kezinde qoldanylǵan.
Atalǵan qurylǵylar patsientterdiń ómirlik mańyzdy kórsetkishterin baqylaýǵa arnalǵan. Olardyń qatarynda júrek soǵý jiiligi, arteriialyq qysym, qandaǵy ottegi deńgeii, elektrokardiogramma jáne dene temperatýrasy bar. Mundai jabdyqtardy ólsheý dáldigi rastalmai qoldaný klinikalyq sheshim qabyldaýǵa tikelei áser etip, patsientterdiń qaýipsizdigine qaýip tóndiredi.
Tekserý barysynda meditsinalyq uiym Qazaqstan Respýblikasynyń «Ólshem birligin qamtamasyz etý týraly» zańynyń 17 jáne 19-baptarynyń talaptaryn buzǵany anyqtaldy. Barlyq faktiler tekserý materialdarymen rastalǵan.
Nátijesinde mekemege anyqtalǵan zańbuzýshylyqtardy joiý týraly mindetti nusqama berildi. Jabdyqtardy paidalaný zań talaptaryna tolyq sáikestendirilýi tiis.
Jiberilgen buzýshylyqtar úshin meditsinalyq uiym Ákimshilik quqyq buzýshylyq týraly kodekstiń 419-baby boiynsha jaýapkershilikke tartyldy. Aiyppul mólsheri 600 AEK, iaǵni 2 595 000 teńgeni qurap, belgilengen tártipte tólengen.
Departament ókilderi metrologiialyq baqylaý talaptaryn saqtaý mindetti ekenin atap ótti. Olardyń aitýynsha, bul talaptar patsientterdiń qaýipsizdigimen tikelei bailanysty, sondyqtan belgilengen normalardan kez kelgen aýytqýǵa jol berilmeidi.
