Eńbek jáne halyqty áleýmettik qorǵaý ministrligi azamattardy jumys kúshi kóp aimaqtardan "jumys kúshi tapshy" óńirlerge erikti túrde kóshirý máselelerin retteý salasyndaǵy qoldanystaǵy normativtik quqyqtyq aktilerge túzetýler paketin ázirledi, dep habarlaidy Dalanews.kz.
Qujat "Ashyq zańdy tulǵalar" portalynda jariialandy.
Ministrlik málimetinshe, túzetýler paketi anyqtalǵan máseleler men Bas prokýratýranyń usynymdaryn eskere otyryp ázirlendi.
Atap aitqanda, kelesi ózgerister qarastyrylǵan:
- mansap ortalyqtar qyzmetkerleriniń qonys aýdarýshy nemese qandas usynǵan qujattardy, ekonomikalyq mobildilik sertifikaty boiynsha aqshalai tólemdi paidalana otyryp satyp alynatyn jyljymaityn múlik obektisi boiynsha málimetterdi olardyń tolyqtyǵy men durystyǵy turǵysynan, tolyq jáne muqiiat qaraý úshin mámile obektisine barý jolymen salystyryp tekserýdi júzege asyrýy;
- satyp alynatyn jyljymaityn múliktiń qunyn baǵalaý nátijelerine shaǵymdaný boiynsha eńbek mobildiligi ortalyqtarynyń quqyǵyn keńeitý;
- qonys aýdarýshynyń nemese qandastyń budan buryn ekonomikalyq mobildilik sertifikaty arqyly satyp alynǵan turǵyn úidi satyp alý nieti bolǵan jaǵdaida ekonomikalyq mobildilik sertifikatyn berýden bas tartý boiynsha qosymsha negizdi bekitý;
- qonys aýdarýshylardyń qonystaný aýmaǵynan tys jerlerde eńbek qyzmetin júzege asyrý quqyǵyn alyp tastaýyn qozdeidi.
Ministrlik málimetinshe, 2025 jyldyń naýryz aiynan bastap kandidattar men qonys aýdarýshylardy óńirlik kvotaǵa engizý máselesi qaralyp jatyr. Sondai-aq erikti qonys aýdarýdy memlekettik qoldaý sharalaryn kórsetý boiynsha memlekettik qyzmetterdi avtomattandyrý josparlanyp otyr.
"Osylaisha, qyzmet alýshylar men mansap ortalyqtarynyń qyzmetkerleri arasyndaǵy bailanys alynyp tastalady. Bul sybailas jemqorlyq táýekelderin barynsha azaitady. Atalǵan memlekettik qyzmet túrlerin tsifrlandyrý kóshirýge qatysýshylar men eńbek utqyrlyǵy ortalyqtary arasyndaǵy sharttyq mindettemelerdiń oryndalýyna naqty taldaýdy qamtamasyz etedi", – delingen habarlamada.
Ministrlik habarlaýynsha, bul buiryq jobasyn qabyldaý, teris áleýmettik-ekonomikalyq nemese quqyqtyq saldarlarǵa ákep soqpaidy.
Resmi derekterge súiensek, Qazaqstan táýelsizdik alǵan 1991 jyldan beri respýblikaǵa basqa elderden 1 million 140,7 myń etnikalyq qazaq oralǵan.
Qazaqstanda elge Qytaidan kóship kelgen migranttar men úmitkerler úshin qiyn jaǵdailar jii týyndaidy. Kóbinese soltústik óńirlerge qonys aýdarǵan qandastar qiyndyqqa tap bolatynyn aitady. Qonys aýdarýshylar atap ótken faktorlardyń qatarynda, turǵyn úimen qamtamasyz etý, jumysqa ornalasý jáne infraqurylymnyń damymaý máseleleri bar.
