Senator, Joǵarǵy sottyń burynǵy tóraǵasy Jaqyp Asanov bir top buzaqynyń qolynan qaza tapqan Sherzat Bolattyń ólimine qatysty pikir bildirdi, dep habarlaidy Dalanews.kz.
Aitýynsha, áldekimder onyń esimin paidalaný arqyly jalǵan aqrapat taratýda. Ol “Hýtor” bandasynyń basshysy dep kúdikke ilingen atyshýly Hasan Qasymbekovpen týystyq bailanysy bar degen aqparat shyndyqqa janaspaitynyn jetkizdi.
“Bul aqparat týraly birinshi kúni-aq estidim. Men buǵan qatysty pikir bildirýden bas tarttym. Óitkeni munyń bári ótirik, jalǵan. Ony tanymaimyn, bilmeimin, kórgen emespin. Talǵarda birde-bir týysym joq. Qazir áleýmettik jelide jalǵan aqparat kóp. Onyń bárine sene berýge bolmaidy. Biraq kim biledi? Bireý meniń atymdy shyǵaraiyn degen shyǵar. Másele tek mende emes. Jalpy ótirik nárse kóp. Onyń barlyǵy tergeý amaldaryn júrgizýge kedergi jasaidy”, – deidi senator Stan.kz agenttigine bergen jaýabynda.
Sondai-aq ol Sherzat Bolattyń jaýyzdyqpen óltirilýine bailanysty pikir bildirdi. Onyń sózinshe, ashyq sottyń bolar-bolmasyn sýdia sheshedi.
“Talǵardaǵy óte qiyn jaǵdai. Qiianattyń qiianaty. Jap-jas mekteptegi balany eresek birneshe erkek jabylyp uryp, áke-sheshesiniń kózinshe óltirgeni óte aýyr. Qazanyń jeńili joq deidi. Dese de bul aýyr jaǵdai.
Prokýratýra sottyń ashyq ótýin suraimyz dep aityp qaldy. Biraq ony sýdia sheshedi. Ol týraly meniń aitqanym orynsyz bolady. Óitkeni ony sol is boiynsha tóraǵalyq etetin sýdia sheshedi”, – dedi Jaqyp Asanov Stan.kz-ke.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
Al 15 qazanda Ishki ister vitse-ministri taǵy úsh kúdiktini ustaǵanyn málim etti.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
Odan keiin Sherzattyń úiine kúzet qoiyldy.
Kóp uzamai marqum Sherzattyń úii órtendi.
