Qazaqstanda jer qoinaýyn paidalaný salasynda qaǵazbastylyq pen basqa da júielik kemshilikter anyqtaldy. Bul týraly Joǵary aýditorlyq palatada geologiialyq barlaý jáne jer qoinaýyn paidalaný salasyndaǵy aýdit nátijelerinde aitylady. Atalǵan problemalar mineraldy-shikizat keshenin basqarý protsesterimen bailanysty, dep habarlaidy Dalanews.kz.
Júrgizilgen aýdit paidaly qazbalar keshenin basqarý protsesterinde birqatar júieli kemshilikterdi anyqtady.
"Máselen, rastalǵan qorlardyń azaiýy sebebinen ekonomikalyq ainalymǵa tartylmaǵan, tek aldyn ala baǵalanǵan, biraq naqty dáleldenbegen "qaǵaz júzindegi" qorlardyń úlesi joǵary. Qor ósiminiń baiaýlaý sebepteriniń biri – jer qoinaýyn geologiialyq zertteýge qarjynyń jetkilikti bólinbeýi. Barlaý quqyǵyna litsenziialyq júie engizilgenine qaramastan, jer qoinaýyn paidalanýshylardyń investitsiialyq belsendiligi tómen deńgeide qalyp otyr", delingen habarlamada.
Aýditorlar Ónerkásip jáne qurylys ministrligi geologiialyq aqparatty tsifrlandyrý, derekterdiń tsifrlyq bankin qurý, qorlardy jańartý jáne jekemenshik sektordyń belsendiligin arttyrý jónindegi mindetterdi oryndamaǵanyn atap ótedi. Qazirgi zamanǵy saqtaý oryndarynyń bolmaýy geologiialyq mańyzdy derekterdiń joǵalýy nemese búliný qaýpin týdyrady.
Geologiia komitetiniń tarapynan baqylaýdyń bolmaýy jáne merdigerdiń sharttyq mindettemelerdi tiisti oryndamaýy saldarynan geologiialyq materialdardy tsifrlandyrý boiynsha oryndalmaǵan jumystar úshin memleket esebinen 68,2 mln teńge tólengen.
Ónerkásip jáne qurylys ministrligi jer qoinaýyn paidalanýshylardyń jumys baǵdarlamalaryna mindetti salyqtyq saraptamasyz ózgerister engizýge ruqsat beredi. Bul kompaniialarǵa salyq salý erejelerin óz qalaýynsha túsindirip, salyqtar men basqa da biýdjetke tólenetin tólemderden jaltarýǵa múmkindik beredi.
"Qazaqstannyń tabiǵi resýrstaryna qyzyǵýshylyqtyń artýyna bailanysty halyqaralyq standarttar boiynsha jumys isteitin zamanaýi ári senimdi zerthanalarǵa suranys artyp keledi. Qajetti zerthanalardyń jetkiliksizdigi baǵaly metaldar men shikizat eksportyn baqylaý sapasynyń tómendeýine ákeledi", delinedi aýdit qorytyndysynda.
Aýditorlar 81 rásimdik buzýshylyq pen 16 júieli kemshilikti anyqtady.
Tekserý nátijeleri boiynsha Joǵary aýditorlyq palata geologiialyq barlaý jáne jer qoinaýyn paidalaný salasyn damytýǵa baǵyttalǵan tiisti usynymdar men tapsyrmalar berdi. Olardy iske asyrý barysy baqylaýda bolady.
Aita ketsek, qazirgi ýaqytta jer qoinaýyn paidalaný eldiń jalpy ishki óniminiń 20%-dan astamyn qamtamasyz etip otyr. Qazaqstanda hrom, temir keni, qorǵasyn, myrysh, mys, ýran, altyn, kúmis jáne basqa da paidaly qazbalardyń iri qory bar.
